آئیچی-ناگویا، 25 ستمبر(ہ س)۔

آٹھ بار کی چمپئن اور دفاعی چمپئن بھارتی مردوں کی کبڈی ٹیم نے سیمی فائنل میں تھائی لینڈ کو 66-28 سے شکست دے کر ایشیائی کھیل 2026 کے فائنل میں جگہ بنا لی۔ بھارتی ٹیم اب اپنے خطاب کا دفاع کرنے سے صرف ایک جیت دور ہے۔

ہندوستان نے مردوں کے کبڈی مقابلے میں نویں مرتبہ فائنل میں جگہ بنائی ہے۔ ٹیم نے پورے مقابلے میں شاندار کارکردگی کا مظاہرہ کرتے ہوئے دونوں ہاف میں تھائی لینڈ پر اپنا غلبہ برقرار رکھا۔ ہندوستان نے پہلے ہاف میں 37 پوائنٹس حاصل کیے، جبکہ تھائی لینڈ کی ٹیم صرف 18 پوائنٹس حاصل کر سکی۔ دوسرے ہاف میں بھی ہندوستان نے 29 پوائنٹس جوڑے، جبکہ تھائی لینڈ کو صرف 10 پوائنٹس ملے۔

پہلے ہاف میں ہندوستان نے 21 آؤٹ پوائنٹس، 12 بونس پوائنٹس اور دو آل آؤٹ حاصل کیے۔ تھائی لینڈ نے 13 آؤٹ پوائنٹس اور تین بونس پوائنٹس حاصل کیے اور ایک آل آؤٹ کیا۔ مقابلے کے ابتدائی مرحلے میں تھائی لینڈ نے بھارتی ٹیم کو چیلنج دینے کی کوشش کی، لیکن ہندوستان نے جلد ہی اپنی گرفت مضبوط کرلی۔ پہلے ہاف کے اختتام پر ہندوستان نے 37-18 کی مضبوط برتری حاصل کرلی۔

دوسرے ہاف میں بھارتی ٹیم نے 22 آؤٹ پوائنٹس اور تین بونس پوائنٹس حاصل کیے، جبکہ مزید دو آل آؤٹ بھی کیے۔ تھائی لینڈ کو اس دوران سات آؤٹ پوائنٹس، دو بونس پوائنٹس اور ایک تکنیکی پوائنٹ ملا۔ ہندوستان نے مسلسل جارحانہ ریڈنگ اور مضبوط دفاع کی بدولت مقابلے کو یکطرفہ بنا دیا۔ تھائی لینڈ کے کھلاڑی تھکن سے دوچار نظر آئے، جس کا ہندوستان نے بھرپور فائدہ اٹھایا۔ دیوانک نے شاندار ریڈنگ کرتے ہوئے مسلسل پوائنٹس حاصل کیے، جبکہ ایان، ارجن دیشوال اور اسلم انعامدار نے بھی ٹیم کی برتری بڑھانے میں اہم کردار ادا کیا۔

بھارتی مردوں کی ٹیم ٹورنامنٹ میں اب تک ناقابل شکست ہے۔ اس نے گروپ اے میں اپنے چاروں مقابلے جیتنے کے بعد سیمی فائنل میں بھی شاندار کامیابی حاصل کی۔ فائنل میں ہندوستان کا سامنا ایران یا چینی تائپے سے ہوگا۔اس سے قبل بھارتی خواتین کی کبڈی ٹیم نے بھی نیپال کو 48-24 سے شکست دے کر فائنل میں جگہ بنالی۔ ہندوستان نے سیمی فائنل میں ابتدا ہی سے غلبہ برقرار رکھا اور پہلے ہاف میں 31-17 کی برتری حاصل کی۔ دوسرے ہاف میں ہندوستان نے 17 پوائنٹس حاصل کیے، جبکہ نیپال کی ٹیم صرف سات پوائنٹس حاصل کر سکی۔پہلے ہاف میں ہندوستان نے 23 آؤٹ پوائنٹس، چار بونس پوائنٹس اور دو آل آؤٹ حاصل کیے۔ نیپال کو 13 آؤٹ پوائنٹس اور تین بونس پوائنٹس ملے، جبکہ اس نے ایک سپر ٹیکل بھی کیا۔

دوسرے ہاف میں بھی ہندوستان کا غلبہ برقرار رہا۔ بھارتی ٹیم نے 12 آؤٹ پوائنٹس، تین بونس پوائنٹس اور ایک آل آؤٹ حاصل کیا۔ نیپال اس دوران صرف پانچ آؤٹ اور دو بونس پوائنٹس ہی حاصل کر سکا۔اس طرح ایشیائی کھیلوں میں ہندوستان کی مردوں اور خواتین، دونوں کبڈی ٹیموں نے فائنل میں جگہ بنا لی ہے۔

ہندوستھان سماچار

ہندوستان سماچار / Mohammad Khan