رانچی، 25 ستمبر (ہ س)۔

دارالحکومت رانچی میں مسلسل ہو رہی بارش کے باعث جمعہ کو شہر کی کئی اہم سڑکوں اور نشیبی علاقوں میں پانی جمع ہوگیا۔ سڑکوں پر پانی جمع ہونے سے گاڑیوں کی رفتار سست رہی اور کئی مقامات پر ٹریفک جام کی صورتحال پیدا ہوگئی۔ لوگوں کو معمول کی آمدورفت میں بھی دشواریوں کا سامنا کرنا پڑا۔

شہر کے اے جی موڑ، کڈرو، کوکر، ڈور نڈا، سریندر ناتھ اسکول کے آس پاس، اسٹیشن روڈ، نامکم اور چٹیا سمیت کئی علاقوں میں بارش کا اثر واضح طور پر نظر آیا۔ کئی مقامات پر سڑک اور نالی کے درمیان فرق ختم ہوگیا اور نالیوں کا پانی سڑکوں پر بہنے لگا۔ دو پہیہ گاڑی چلانے والوں کو سب سے زیادہ پریشانی کا سامنا کرنا پڑا۔ پیدل چلنے والوں کو بھی پانی کے درمیان سے گزرنا پڑا۔

مسلسل بارش کے دوران کئی مقامات پر تیز ہواو¿ں کے باعث درخت اور بجلی کے کھمبے گرنے سے ٹریفک متاثر ہوا۔ بجلی کے تار ٹوٹنے کی وجہ سے بعض علاقوں میں بجلی کی فراہمی بھی متاثر ہوئی۔ متعلقہ محکموں کی ٹیمیں پانی جمع ہونے، گرے ہوئے درختوں اور بجلی سے متعلق مسائل کو دور کرنے میں مصروف رہیں۔

بارش کا اثر شہر کے کاروبار پر بھی پڑا۔ سڑک کنارے دکانیں لگانے والے، ریڑھی پٹری والے کاروباری افراد اور یومیہ اجرت پر کام کرنے والے مزدوروں کو کام کاج میں دشواری ہوئی۔ بارش کے باعث بازاروں میں لوگوں کی آمدورفت بھی کم رہی۔

محلوں اور کالونیوں کی اندرونی سڑکوں پر پانی جمع ہونے کے باعث لوگوں کو گھروں سے نکلنے میں بھی پریشانی ہوئی۔ کئی مقامات پر بڑے درخت گرنے اور دیگر واقعات سے مشکلات مزید بڑھ گئیں۔

خلیج بنگال میں بننے والے گہرے دباو¿ کے اثر سے گزشتہ دو تین دنوں سے جھارکھنڈ میں بارش کا سلسلہ جاری ہے۔ رانچی کے محکمہ موسمیات کے مرکز کے مطابق 25 اور 26 ستمبر کو بارش کا اثر برقرار رہ سکتا ہے۔ 27 ستمبر سے موسم میں بہتری آنے کا امکان ہے، جبکہ 28 ستمبر سے بارش میں راحت ملنے کی توقع ہے۔

ہندوستھان سماچار

ہندوستان سماچار / عطاءاللہ