کاٹھمنڈو، 20 ستمبر (ہ س)۔ خلیج بنگال میں کم دباو والے علاقے کے زیر اثر 24 اور 28 ستمبر کے درمیان نیپال کے مختلف حصوں میں بارش کی سرگرمی میں اضافے کی پیش گوئی کی گئی ہے۔ ماہرین موسمیات نے کچھ علاقوں میں شدید بارش کی پیش گوئی کرتے ہوئے لوگوں پر زور دیا ہے کہ وہ پہلے سے تیاری کریں اور چوکنا رہیں۔

تریبھوون یونیورسٹی کے ہائیڈرولوجسٹ اور ماہر موسمیات بنود پوکھریل نے کہا کہ موسم کی پیش گوئی کے مختلف ماڈلز کا مطالعہ 24 اور 28 ستمبر کے درمیان پورے نیپال میں بارش کے شدید امکان کو ظاہر کرتا ہے۔

انہوں نے سوشل میڈیا پر کہا کہ کچھ ماڈلزنے اس دوران 400 ملی میٹر سے زیادہ بارش کی پیش گوئی کی ہے۔ کچھ حالات میں یہ تعداد 741 ملی میٹر تک پہنچنے کا تخمینہ ہے۔ تاہم، انہوں نے واضح کیا کہ بارش کی یہ مقدار پورے ملک میں یکساں نہیں ہوگی لیکن بعض علاقوں میں زیادہ ہو سکتی ہے۔

پوکھریل نے کہا کہ انہوں نے پیشن گوئی کے کئی ماڈلز کا مطالعہ کرنے کے بعد ہی تخمینہ عام کیا ہے۔ ان کا مقصد لوگوں کو خوفزدہ کرنا نہیں ہے بلکہ انہیں وقت پر تیاری کے لیے خبردار کرنا ہے۔ ان کے مطابق مانسون کے انخلا کے دوران شمال مغربی ہندوستان سے آنے والی خشک ہوائیں خلیج بنگال سے چلنے والے کم دباو والے علاقے کی سمت اور رفتار کو متاثر کر سکتی ہیں۔ اس کی وجہ سے اس کا اثر نیپال کی طرف بڑھ سکتا ہے اور کچھ علاقوں میں بھاری بارش کا خطرہ بڑھ سکتا ہے۔

24 اور 28 ستمبر کے درمیان زیادہ اثرات متوقع ہیںماہر موسمیات اور ماہر ماحولیات اجول اپادھیائے نے بھی خلیج بنگال میں ترقی پذیر موسمی نظام پر گہری نظر رکھنے کی ضرورت پر زور دیا ہے۔ انہوں نے کہا کہ اس وقت دستیاب زیادہ تر موسمی ماڈل 24 اور 28 ستمبر کے درمیان شدید حالات کے آثار دکھا رہے ہیں۔ اپادھیائے کے مطابق، ایسے اشارے ملے ہیں کہ خطرہ 26 ستمبر کو سب سے زیادہ ہوگا۔ تاہم، انہوں نے لوگوں کو مشورہ دیا کہ وہ موجودہ پیش گوئی کو حتمی نہ سمجھیں۔

انہوں نے مزید کہا کہ 24 اور 26 ستمبر کے درمیان ممکنہ شدید بارش کی شدت اب بھی کم ہونے کی توقع ہے۔ گزشتہ سال نومبر میں سمندری طوفان 'مونتھا' کی مثال دیتے ہوئے انہوں نے کہا کہ ہندوستان کے مشرقی ساحل پر طاقتور ہونے کے باوجود نیپال پہنچنے تک یہ کم دباو¿ والے علاقے میں کمزور ہو گیا اور نیپال میں اس کا نقصان توقع سے بہت کم تھا۔

اپادھیائے نے لوگوں سے اپیل کی کہ وہ ممکنہ خطرے سے گھبرانے کے بجائے زیادہ چوکس رہیں۔ انہوں نے مغربی خطے کے علاوہ دیگر علاقوں میں24، 25اور 26 ستمبر کو طویل فاصلے کے سفر کو ملتوی کرنے کا مشورہ دیاہے۔ تاہم، انہوں نے کہا کہ فی الحال یہ واضح نہیں ہے کہ بارش کتنی شدید ہوگی اور کون سے علاقے سب سے زیادہ متاثر ہوں گے۔

محکمہ آبی و موسمیات بھی نگرانی کر رہا ہے۔نیپال کے محکمہ ہائیڈرولوجی اور موسمیات نے کہا ہے کہ خلیج بنگال میں تیار ہونے والے موسمی نظام کی مسلسل نگرانی کی جا رہی ہے۔ محکمہ کے سینئر ماہر موسمیات برن پوڈل نے کہا کہ اس طرح کے موسمی نظام بعض اوقات دباو¿ میں کمزور ہو جاتے ہیں اور اپنی سمت بھی بدل سکتے ہیں۔ اس لیے محکمہ اس نظام پر گہری نظر رکھے ہوئے ہے۔

انہوں نے کہا کہ نیپال پر اس موسمی نظام کے اثرات کے بارے میں آنے والے دنوں میں صورتحال واضح ہو جائے گی۔ اس کے بعد محکمہ سرکاری نوٹس جاری کر کے ضروری معلومات فراہم کرے گا۔

پوڈل نے کہا کہ 24 اور 28 ستمبر کے درمیان بھاری بارش کے بارے میں سوشل میڈیا پر بحث بڑھ رہی ہے، لیکن بارش کی اصل مقدار، اس کی جغرافیائی حد اور خطرے کی سطح کا واضح اندازہ لگانے کے لیے اسے مزید چند دن انتظار کرنا پڑے گا۔ کم دباو کا علاقہ کیسے تیار ہوتا ہے اور آنے والے دنوں میں اس کی سمت اور رفتار میں کیا تبدیلیاں آتی ہیں اس سے نیپال پر اس کے حقیقی اثرات ظاہر ہوں گے۔

دھان کی پکی فصل بھی متاثر ہو سکتی ہے۔ماہرین موسمیات کا کہنا ہے کہ اگر پیش گوئی کے مطابق بارش ہوتی ہے تو اس سے زرعی شعبے، خاص طور پر کھیتوں میں تیار کی جانے والی دھان کی پکی فصل بھی متاثر ہو سکتی ہے۔ انہوں نے کسانوں سے اپیل کی ہے کہ وہ موسمی حالات کی نگرانی کریں اور ضروری احتیاطی تدابیر اختیار کریں۔

ہندوستھان سماچار

---------------

ہندوستان سماچار / عبدالسلام صدیقی