نئی دہلی، 19 ستمبر (ہ س)۔ بھارتی کرکٹ ٹیم اگلے ماہ نیوزی لینڈ کے دورے پر جائے گی، جہاں دونوں ٹیموں کے درمیان پانچ ٹی-20، پانچ ون ڈے اور دو ٹیسٹ میچوں کی سیریز کھیلی جائے گی۔ دورے کے آغاز سے قبل میزبان نیوزی لینڈ کو بڑا دھچکا لگا ہے۔ ٹیم کے آل راو¿نڈر رچن رویندر دائیں کندھے کی چوٹ کا شکار ہوگئے ہیں۔رچن رویندر حال ہی میں آکلینڈ میں ایک تشہیری شوٹ کے دوران ڈائیو لگا کر کیچ لینے کی کوشش کرتے ہوئے اپنے دائیں کندھے کو زخمی کر بیٹھے۔ بین الاقوامی کرکٹ کونسل (آئی سی سی) کے مطابق 18 ستمبر کو طبی ماہرین کی جانب سے کیے گئے ابتدائی معائنے میں کسی سنگین نقصان کا خدشہ ظاہر نہیں کیا گیا ہے۔ تاہم، کرکٹ میں رچن کی واپسی کا انحصار بحالی کے ابتدائی چند ہفتوں کے دوران ان کی پیش رفت پر ہوگا۔

فی الحال یہ واضح نہیں ہے کہ رچن رویندر 22 اکتوبر سے شروع ہونے والی بھارت کے خلاف پانچ میچوں کی ٹی-20 بین الاقوامی سیریز میں حصہ لے سکیں گے یا نہیں۔ ان کی فٹنس اور بحالی کی صورتحال کو دیکھتے ہوئے ہی حتمی فیصلہ کیا جائے گا۔نیوزی لینڈ کی مردوں کی ٹیم کے ہیڈ کوچ راب والٹر نے کہا کہ اگلے چھ ماہ کے دوران ٹیسٹ کرکٹ کا مصروف شیڈول ہے، اس لیے ٹیم رچن کو وقت سے پہلے میدان میں اتارنے میں جلد بازی نہیں کرنا چاہتی۔انہوں نے کہا کہ رچن کی بحالی کا عمل بہت اچھا چل رہا ہے اور ٹیم جلد ہی ان کا استقبال کرنے کی منتظر ہے۔بھارت اور نیوزی لینڈ کے درمیان محدود اوورز اور ٹیسٹ سیریز کا آغاز 22 اکتوبر سے ہوگا، جس میں اب تقریباً ایک ماہ کا وقت باقی ہے۔ رچن رویندر کی فٹنس پر نیوزی لینڈ کرکٹ کی نظر رہے گی اور آنے والے ہفتوں میں ان کی دستیابی کے بارے میں مزید وضاحت متوقع ہے۔

ہندوستھان سماچار

ہندوستان سماچار / Mohammad Khan