جودھپور، 19 ستمبر (ہ س)۔

منشیات کی اسمگلنگ کے خلاف جاری مہم کے تحت جودھپور مشرقی پولیس نے افیون کی اسمگلنگ سے حاصل کی گئی جائیداد کے خلاف کارروائی کی ہے۔ پولیس نے ملزم رتن سنگھ ولد ہنومان رام، ساکن رتکڑیا، حال مقیم ایکتا نگر، رمضان جی کا ہتھا، کے خلاف این ڈی پی ایس ایکٹ کی دفعہ 68 (ایف) (1) کے تحت کارروائی کرتے ہوئے تقریباً 2 کروڑ روپے کی جائیداد منجمد کرنے کے احکامات جاری کیے ہیں۔

پولیس کے مطابق 17 جولائی 2026 کو ملزم رتن سنگھ کے قبضے سے کریٹا کار میں 8.264 کلو گرام افیون اور ایک کروڑ 6 لاکھ 50 ہزار روپے نقد برآمد کیے گئے تھے۔ اس معاملے میں تھانہ بناڑ میں این ڈی پی ایس ایکٹ کی دفعات 8/18 کے تحت مقدمہ درج کیا گیا تھا۔ تحقیقات کے دوران یہ بات سامنے آئی کہ ملزم نے منشیات کی اسمگلنگ اور فروخت سے حاصل ہونے والی رقم سے جائیداد بنائی تھی۔

مکان کی قیمت 93.39 لاکھ روپے

تحقیقات کے بعد ملزم کی غیر قانونی طور پر حاصل کی گئی جائیداد کا پتہ لگایا گیا۔ کارروائی کے تحت ایک کروڑ 6 لاکھ 50 ہزار روپے نقد اور گرام ناندڑی میں کھسرہ نمبر 81/1 کے پلاٹ نمبر 36 سے 39 پر تعمیر شدہ ملزم کے رہائشی مکان کو شامل کیا گیا ہے۔ مکان کی موجودہ قیمت 93 لاکھ 39 ہزار 28 روپے بتائی گئی ہے۔ دونوں کی مجموعی قیمت تقریباً 2 کروڑ روپے ہے۔

پولیس نے این ڈی پی ایس ایکٹ کی دفعہ 68 (ایف) (1) کے تحت جائیداد منجمد کرنے کی تجویز مجاز اتھارٹی، نئی دہلی کو بھیجی تھی۔ تحقیقات کے بعد مجاز اتھارٹی نے جائیداد منجمد کرنے کے حکم کو منظوری دے دی۔ اب مجاز اتھارٹی کی پیشگی اجازت کے بغیر اس جائیداد کو کسی بھی طریقے سے منتقل نہیں کیا جا سکے گا۔

پولیس کے مطابق رتن سنگھ کے خلاف مختلف تھانوں میں این ڈی پی ایس ایکٹ کے تحت کل دو مقدمات درج ہیں۔ اس کے علاوہ منشیات کی اسمگلنگ سے حاصل ہونے والی آمدنی سے زمین، پلاٹ وغیرہ میں سرمایہ کاری کیے جانے کے بارے میں بھی معلومات جمع کی جا رہی ہیں۔ ایسی جائیدادوں کے سلسلے میں مزید مو¿ثر کارروائی کی جائے گی۔

ہندوستھان سماچار

ہندوستان سماچار / عطاءاللہ