علی گڑھ، 19 ستمبر (ہ س)۔ علی گڑھ مسلم یونیورسٹی کے شعبہ بزنس ایڈمنسٹریشن نے طلبہ میں خود آگہی، اعتماد، حالات کے مطابق خود کو ڈھالنے کی صلاحیت اور ذاتی و پیشہ ورانہ ترقی کے لیے ضروری دیگر اوصاف کو مضبوط بنانے کے مقصد سے شخصیت سازی کی ورکشاپ منعقد کی۔

مہمانِ خصوصی پروفیسر محمد مزمل، پرنسپل، ذاکر حسین کالج آف انجینئرنگ اینڈ ٹکنالوجی نے بدلتے ہوئے پیشہ ورانہ ماحول میں حالات کے مطابق خود کو ڈھالنے کی صلاحیت اور شخصیت کے دیگر اوصاف کی اہمیت پر روشنی ڈالی۔ صنعتی شعبے کے رہنماؤں اور معروف برانڈز کی مثالیں پیش کرتے ہوئے انہوں نے ان اوصاف پر گفتگو کی جو افراد کو چیلنجوں سے نمٹنے اور مسلسل ترقی حاصل کرنے میں مدد دیتے ہیں۔

شعبہ نفسیات کی پروفیسر رومانہ صدیقی نے خود آگہی، اعتماد، ترقی پسند ذہنیت، تناؤ سے نمٹنے، حالات کے مطابق خود کو ڈھالنے، ہمدردی اور مثبت سوچ کے موضوعات پر ایک نشست منعقد کی۔ انہوں نے کہا کہ شخصیت جامد نہیں ہوتی بلکہ مسلسل سیکھنے اور خود احتسابی سے اس کی نشو و نما ہوتی رہتی ہے۔

اس سے قبل فیکلٹی آف مینجمنٹ اسٹڈیز اینڈ ریسرچ کے ڈین پروفیسر محمد نوید خان نے مہمانوں، اساتذہ اور طلبہ کا خیرمقدم کیا اور شرکاء کو اپنی ذاتی و پیشہ ورانہ ترقی کے لیے ورکشاپ سے بھرپور استفادہ کرنے کی ترغیب دی۔

شعبہ بزنس ایڈمنسٹریشن کی چیئرپرسن پروفیسر سلمیٰ احمد نے شخصیت کی مسلسل نشوونما کی اہمیت پر زور دیتے ہوئے طلبہ کی حوصلہ افزائی کی کہ وہ نشستوں کے دوران حاصل ہونے والی معلومات اور بصیرت کو اپنی ذاتی و پیشہ ورانہ زندگی میں بروئے کار لائیں۔

پروفیسر اسد رحمان نے شخصیت، خود آگہی، جذباتی ذہانت، ابلاغ اور پیشہ ورانہ ترقی کے موضوعات پر ایک نشست منعقد کی، جبکہ پروفیسر فضا تبسم اعظمی نے تاثر قائم ہونے میں شخصیت کے مختلف پہلوؤں کے کردار پر اظہار خیال کیا۔

پروفیسر سلمیٰ احمد اور ریسرچ اسکالر مس ثانیہ خان نے ‘رنگ اور شخصیت’ کے عنوان سے ایک سرگرمی منعقد کی، جس کے ذریعے طلبہ کو رنگوں کی پسند اور شخصیت کے اوصاف کے درمیان تعلق کا جائزہ لینے کا موقع ملا۔ شرکاء کو مثبت عادات پیدا کرنے میں اپنی پیش رفت کا جائزہ لینے کے لیے 30 روزہ چیلنج کی جائزہ شیٹ بھی فراہم کی گئی۔

پروگرام کی نظامت ایم بی اے کی طالبات مس شیزا امین اور مسٹر محمد انس نے کی، جبکہ مس ثانیہ راشد اور مس فاطمہ اقبال نے کلماتِ تشکر ادا کیے۔

ہندوستھان سماچار

---------------

ہندوستان سماچار / سید کامران علی گڑھ