احمد آباد/گاندھی نگر، 10 ستمبر(ہ س)۔ گجرات میں بم دھماکوں کے خطرے نے ایک بار پھر خوف و ہراس پیدا کر دیا ہے۔ احمد آباد کے ویجل پورواقع گائیڈز اسکول ،بوپل کی ڈی پی ایس اور ادگام اسکول کو بم کی دھمکی والی ای میلز موصول ہوئی ہیں۔ دھمکی ملنے کے بعد اسکول انتظامیہ نے فوری طور پر والدین کو بچوں کو گھر بھیجنے کی اطلاع دی۔بم اسکواڈ، فائر ڈپارٹمنٹ، پولیس اور 108 ایمبولینس کی ٹیمیں ای میل کی اطلاع ملتے ہی متعلقہ اسکولوں میں پہنچ گئیں۔ حفاظتی وجوہات کی بنا پر اسکولوں کو فوری طور پر خالی کرا لیا گیا اور پورے کیمپس کی تلاشی شروع کر دی گئی ہے۔

گائیڈز اسکول نے والدین کو پیغامات بھیجے جن میں انہیں ہدایت کی گئی کہ وہ طلباءکو اپنے گھر لے جائیں۔ اس کے بعد والدین کو خوف کے ماحول میں اسکولوں کی طرف دوڑتے ہوئے دیکھا گیا۔فائر بریگیڈ کی دو گاڑیاں اور پولیس کی ایک ٹیم بھی اسکول پہنچی۔ احتیاط کے طور پر پورے اسکول کیمپس کو خالی کرا لیا گیا۔ فائر ڈپارٹمنٹ کی ٹیم نے بھی کسی بھی ناخوشگوار واقعے سے نمٹنے کے لیے ذمہ داری سنبھالی۔ڈی ای او روہت چودھری نے کہا کہ جن اسکولوں کو دھمکی آمیز ای میلز موصول ہوئی ہیں ان کی تحقیقات کی جائیں گی۔ جس اسکول کو ای میل موصول ہوئی ہے اس کے لیے پولیس کو اطلاع دینا لازمی ہوگا۔ انہوں نے اسکولوں کو ہدایت کی ہے کہ وہ بچوں کو بحفاظت نکال لیں اور پولیس کی تحقیقات میں مکمل تعاون کریں۔

اس دوران، گاندھی نگر میں ڈسٹرکٹ اینڈ سیشن کورٹ کو بھی بم سے اڑانے کی شدید دھمکی کے بعدخوف ہراس پھیل گیا ہے۔ دھمکی آمیز میل صبح نامعلوم سماج دشمن عناصر کی طرف سے ای میل کے ذریعے بھیجی گئی تھی۔میل موصول ہونے کے بعد عدالت کے احاطے میں موجود ججوں، وکلاء، عملے اور دیگر افراد میں خوف و ہراس پھیل گیا۔ حفاظتی وجوہات کی بنا پر پورے عدالت کے احاطے کو فوری طور پر خالی کرا لیا گیا اور وکلاء اور شہریوں کو بحفاظت نکال لیا گیا۔اے بی والانڈے، اے سی پی، اے ایم ڈویڑن نے کہا کہ دھمکی آمیز ای میل صبح تقریبا 9 بج کر 44 منٹ پر گائیڈز اسکول، ویجل پور میں موصول ہوئی۔ اطلاع ملتے ہی پولیس موقع پر پہنچ گئی۔ فائر بریگیڈ کی ایک ٹیم بھی موقع پر پہنچی۔انہوں نے کہا کہ اس وقت بم اسکواڈ کی ٹیم اسکول کے احاطے کا معائنہ کر رہی ہے۔ اسکول کو بھیجے گئے دھمکی آمیز ای میل میں 'خالصتان' کا بھی ذکر ہے۔ اس بنیاد پر اب مقدمے کی تفتیش آگے بڑھے گی۔پولیس اور سیکورٹی ایجنسیاں یہ جاننے کی کوشش کر رہی ہیں کہ دھمکی آمیز ای میل کے پیچھے کون ہے اور اس کا مقصد کیا تھا۔

ہندوستھان سماچار

---------------

ہندوستان سماچار / عبدالسلام صدیقی