اندور میں 8 یا 12 ستمبر کو ہو سکتا ہے پروگرام، کانگریس نے میونسپل کارپوریشن سے اجازت مانگی

اندور، 29 اگست (ہ س)۔

کانگریس رہنما اور لوک سبھا میں حزب اختلاف کے رہنما راہل گاندھی کی جلد ہی مدھیہ پردیش کے شہر اندور میں آمد ہونے جا رہی ہے۔ پارٹی بڑے پیمانے پر ’چھاتروں کی گونج‘ پروگرام منعقد کرنے کی تیاری کر رہی ہے۔ اندور کے نہرو اسٹیڈیم میں پروگرام مجوزہ ہے، جس میں راہل گاندھی شامل ہوں گے اور طلبہ سے براہ راست بات چیت کریں گے۔

پروگرام کی تیاریوں کے سلسلے میں ہفتہ کے روز ریاستی کانگریس صدر جیتو پٹواری کی رہائش گاہ پر میٹنگ منعقد ہوئی۔ اس میں کے بی بائیجو، ست نارائن پٹیل، شوبھا اوجھا، وپن وانکھیڑے، چنٹو چوکسے، سدا شیو یادو، سنجے کامبلے، رینا بوراسی سمیت دیگر رہنما اور عہدیداران شریک ہوئے۔

میٹنگ میں مقامی کانگریس رہنماوں اور عہدیداران کے ساتھ پروگرام کے خدوخال، جائے تقریب اور طلبہ کی شرکت سمیت دیگر امور پر تبادلہ خیال کیا گیا۔ کانگریس کا منصوبہ اس پروگرام کے ذریعے طلبہ سے متعلق مسائل کو نمایاں طور پر اٹھانے کا ہے۔ ساتھ ہی نوجوانوں تک پارٹی کا پیغام پہنچانے پر بھی خصوصی توجہ مرکوز رہے گی۔

وہیں، اندور سٹی کانگریس کمیٹی کے صدر چنٹو چوکسے نے شہری سطح پر ’چھاتروں کی گونج‘ کے عنوان سے ایک وسیع عوامی مکالمے کے پروگرام کے سلسلے میں اندور میونسپل کارپوریشن کے کمشنر کو ایک باضابطہ درخواست بھیج کر تقریب کے مقام کی اجازت مانگی ہے۔ ارسال کردہ خط میں 8 ستمبر سے 12 ستمبر تک کی مدت کے لیے شہر کے وسط میں واقع اہم اسپورٹس کمپلیکس نہرو اسٹیڈیم کو مکمل طور پر بک کیے جانے کی خصوصی درخواست کی گئی ہے۔

پروگرام کے سلسلے میں تفصیلی معلومات شیئر کرتے ہوئے چنٹو چوکسے نے بتایا کہ ملک گیر ’چھاتروں کی گونج‘ مہم کے تحت راہل گاندھی ملک کی مختلف ریاستوں کا دورہ کر کے طلبہ سے براہ راست گفتگو کر رہے ہیں۔ اندور میں منعقد ہونے والے اس مکالمے کے پروگرام کے ذریعے وہ نوجوانوں سے وابستہ اہم اور سلگتے ہوئے موضوعات مثلاً نظامِ تعلیم، روزگار کے مواقع، تعلیمی اداروں میں فیسوں میں اضافہ، مسابقتی امتحانات کے پرچے (پیپر) لیک ہونے اور نوجوانوں کے دیگر بنیادی مسائل پر کھل کر بات چیت کریں گے۔

شہر کانگریس صدر چنٹو چوکسے کے مطابق، اس پروقار مکالماتی پروگرام میں اندور شہر کے ساتھ ساتھ آس پاس کے مختلف اضلاع سے بھی بڑی تعداد میں طلبہ اور نوجوان طبقے کی شرکت کا قوی امکان ظاہر کیا جا رہا ہے۔ متوقع بڑے ہجوم اور نوجوانوں کی بھاری موجودگی کے پیش نظر وسیع و عریض نہرو اسٹیڈیم کو اس بڑے پروگرام کے لیے سب سے موزوں مقام سمجھا گیا ہے۔ حفاظتی معیارات، انتظامی انتظامات اور ابتدائی تیاریوں کو مکمل کرنے کے مقصد سے 12-8 ستمبر تک کے لیے اسٹیڈیم بک کرنے کا مطالبہ رکھا گیا ہے۔

ہندوستھان سماچار

---------------

ہندوستان سماچار / انظر حسن