نئی دہلی، 29 اگست (ہ س)۔ دہلی کے آدرش نگر تھانہ پولیس نے ہفتہ کو کیمیکل تاجر کے 23.60 لاکھ روپے کی مبینہ خرد برد کے معاملے کا انکشاف کرتے ہوئے ملزم ملازم ارجن شرما (37) کو گرفتار کر لیا۔

پولیس کے مطابق، ملزم کے قبضے سے 20.80 لاکھ روپے نقد، واردات میں استعمال کیا گیا ایکٹیوا اسکوٹر اور تین موبائل فون برآمد کیے گئے ہیں۔ ملزم کا پہلے سے کوئی مجرمانہ ریکارڈ نہیں ہے۔ پولیس نے بتایا کہ اشوک وہار کے رہنے والے شکایت کنندہ کا لال باغ علاقے میں کیمیکل کا کاروبار ہے۔ 21 اگست کو انہوں نے اپنے ملازم ارجن شرما کو سرسوتی وہار (سی-522) واقع ایک کاروباری پارٹی سے 23.60 لاکھ روپے لے کر بینک میں جمع کرانے کے لیے بھیجا تھا۔ ارجن نے صبح تقریباً 10:30 بجے رقم لے لی، لیکن بینک جانے کے بجائے اپنا موبائل فون بند کرکے فرار ہوگیا۔ کافی تلاش کے بعد جب اس کا کوئی سراغ نہیں ملا تو تاجر نے آدرش نگر تھانے میں شکایت درج کرائی۔

شکایت کی بنیاد پر پولیس نے 24 اگست کو مقدمہ درج کیا۔ ملزم کو گرفتار کرنے کے لیے اے ایس آئی گوپال کرشن، ہیڈ کانسٹیبل سندیپ، ہیڈ کانسٹیبل لیلا رام اور کانسٹیبل دھرمندر پر مشتمل ایک خصوصی ٹیم تشکیل دی گئی۔

تفتیش کے دوران سامنے آیا کہ ملزم نے پولیس اور اپنے مالک سے بچنے کے لیے اپنے پرانے فون نمبرز اور سوشل میڈیا اکاؤنٹس مکمل طور پر بند کر دیے تھے۔ پولیس ٹیم نے تکنیکی نگرانی اور فیلڈ انٹیلی جنس کے ذریعے اس کے ایکٹیوا کی نقل و حرکت کو ٹریک کیا۔ اس دوران پتہ چلا کہ وہ گرفتاری سے بچنے کے لیے جے پور، چندی گڑھ اور منالی تک فرار ہوا تھا۔

پولیس ٹیم نے گھیرابندی کرکے ملزم ارجن کو گرفتار کر لیا اور اس کے قبضے سے 20.80 لاکھ روپے نقد برآمد کر لیے۔ پولیس اب باقی 2.80 لاکھ روپے کی برآمدگی کے لیے ملزم سے پوچھ گچھ کر رہی ہے۔ ساتھ ہی یہ بھی جانچ کی جا رہی ہے کہ فرار کے دوران کسی دوسرے شخص نے اسے پناہ یا مالی مدد تو فراہم نہیں کی تھی۔

ہندوستھان سماچار

---------------

ہندوستان سماچار / عبدالواحد