نئی دہلی، 27 اگست (ہ س)۔ دہلی کے وزیر صحت ڈاکٹر پنکج کمار سنگھ نے بدھ کو دارالحکومت میں ایچ ون این ون کے بڑھتے ہوئے معاملات کے پیش نظر دوارکا کے اندرا گاندھی اسپتال کا معائنہ کیا۔ انہوں نے اسپتال اور محکمہ صحت کی تیاریوں کا بھی جائزہ لیا۔ دہلی میں گزشتہ 24 گھنٹوں کے دوران ایچ ون این ون کے 166 معاملے سامنے آئے ہیں، جبکہ دارالحکومت میں مجموعی معاملات کی تعداد بڑھ کر 2612 ہو گئی ہے۔ وہیں انفلوئنزا-اے کے کل معاملات تقریباً 3300 ہو گئے ہیں۔

وزیر صحت نے اسپتال میں قائم خصوصی ایچ ون این ون آئسولیشن وارڈ کا باریک بینی سے معائنہ کرنے کے ساتھ مریضوں کے علاج اور دیکھ بھال کے انتظامات کا بھی جائزہ لیا۔ انہوں نے اسپتال کے ڈاکٹروں، ہیلتھ کیئر ورکرز اور مریضوں سے بات چیت کی اور بستروں، آکسیجن، ادویات، فلوئڈ، ٹیسٹنگ سہولیات اور دیگر ضروری طبی سہولیات کی دستیابی کا بھی جائزہ لیا۔

وزیر نے بیداری اور عوامی رابطہ مہم کے تحت استعمال کیے جانے والے آئی ای سی میٹریل کا بھی جائزہ لیا، تاکہ یہ یقینی بنایا جا سکے کہ ایچ ون این ون کی روک تھام اور بچاؤ، علامات اور ضروری احتیاطی تدابیر کے بارے میں لوگوں تک درست معلومات بروقت پہنچائی جا سکیں۔

اندرا گاندھی اسپتال کے معائنے کے بعد وزیر صحت نے کہا کہ میں دہلی کے عوام کو یقین دلانا چاہتا ہوں کہ کسی بھی شخص کو گھبرانے کی بالکل ضرورت نہیں ہے۔ دہلی حکومت اور ہمارا محکمہ صحت پوری طرح تیار ہے۔ ہمارے ڈاکٹر، نرسیں، لیب ٹیکنیشن اور دیگر صحت کارکن پوری طرح چوکس ہیں اور پوری سنجیدگی اور لگن کے ساتھ اپنی ذمہ داریاں نبھا رہے ہیں۔

وزیر صحت نے کہا کہ اندرا گاندھی اسپتال کا آج کا دورہ زمینی سطح پر تیاریوں کا جائزہ لینے کی ہماری حکومت کی مسلسل کوششوں کا حصہ ہے۔ انہوں نے مزید کہا کہ اسپتال میں ایچ ون این ون مریضوں کے لیے ایک خصوصی آئسولیشن وارڈ بنایا گیا ہے۔ آکسیجن، ادویات، فلوئڈ، ٹیسٹنگ اور دیگر ضروری طبی سہولیات کے لیے خاطر خواہ انتظامات کیے گئے ہیں۔ ہم مسلسل اسپتال کی تیاریوں کا جائزہ لے رہے ہیں اور یہ یقینی بنا رہے ہیں کہ مریضوں کی دیکھ بھال میں کسی بھی طرح کی کوئی کمی نہ رہے۔

اسپتال نے سوائن فلو/ایچ ون این ون کے لیے ایک خصوصی کلینک بھی قائم کیا ہے، جہاں مشتبہ مریضوں کی سب سے پہلے جانچ کی جائے گی۔

وزیر صحت نے دہلی کے شہریوں سے اپیل کرتے ہوئے کہا کہ کسی کو بھی گھبرانے کی کوئی ضرورت نہیں ہے۔ اس بیماری کی علامات زیادہ تر عام موسمی فلو یا بخار جیسی ہی ہوتی ہیں اور مریض علاج کے بعد صحت یاب ہو کر اپنے گھروں کو واپس جا رہے ہیں۔ فی الحال جو مریض اسپتالوں میں داخل ہیں، ڈاکٹر ان کا مناسب علاج اور نگرانی کر رہے ہیں۔

وزیر صحت نے لوگوں سے صحت سے متعلق ایڈوائزری پر عمل کرنے اور بنیادی احتیاطی تدابیر اختیار کرنے کی اپیل کی۔ انہوں نے غیر ضروری طور پر بھیڑ بھاڑ والی جگہوں پر جانے سے گریز کرنے، صابن اور پانی سے باقاعدگی سے ہاتھ دھونے کے ساتھ سینیٹائزر استعمال کرنے اور عام صفائی ستھرائی برقرار رکھنے کا مشورہ دیا۔

ہندوستھان سماچار

---------------

ہندوستان سماچار / عبدالواحد