پریاگ راج میں سیلاب کا خطرہ ٹلا، 24 گھنٹے میں جمنا اور گنگا کی پانی کی سطح میں تقریباً 40 سینٹی میٹر کی کمی

پریاگ راج، 25 اگست (ہ س)۔ عالمی شہرت یافتہ پریاگ راج میں گنگا اور جمنا کی پانی کی سطح میں مسلسل کمی آنے سے پریاگ راج میں سیلاب کی صورتِ حال میں بہتری آئی ہے۔ ضلع انتظامیہ کی جانب سے منگل کی صبح آٹھ بجے جاری کردہ رپورٹ کے مطابق دونوں ندیوں کی آبی سطح خطرے کے نشان سے تقریباً پانچ میٹر نیچے ہے۔ ضلع کے تمام پشتے پوری طرح محفوظ ہیں۔ گزشتہ 24 گھنٹے میں گنگا اور یمنا کی آبی سطح میں تقریباً 38 سے 42 سینٹی میٹر تک کمی درج کی گئی ہے۔

پریاگ راج میں سیلاب کے خطرے کا نشان 84.734 میٹر ہے۔ منگل کی صبح آٹھ بجے جمنا کی آبی سطح نینی میں 79.74 میٹر درج کی گئی۔ یہاں گزشتہ 24 گھنٹے میں 42 سینٹی میٹر کی کمی آئی ہے۔ نینی علاقے میں اس دوران 14.6 ملی میٹر بارش درج کی گئی۔ اسی طرح گنگا کی پانی کی سطح پھاپھامؤ میں 80.69 میٹر رہی۔ یہاں بھی گزشتہ 24 گھنٹے میں 42 سینٹی میٹر کی گراوٹ درج کی گئی۔ پھاپھامؤ میں اس عرصے کے دوران 28.7 ملی میٹر بارش ہوئی۔

چھتناگ میں گنگا کی آبی سطح 79.28 میٹر درج کی گئی، جو گزشتہ 24 گھنٹے کے مقابلے 39 سینٹی میٹر کم ہے۔ یہاں 18 ملی میٹر بارش درج کی گئی۔ وہیں ایس ٹی پی-بکسی باندھ پر آبی سطح 79.90 میٹر رہی اور یہاں بھی 24 گھنٹے میں 38 سینٹی میٹر کی کمی آئی۔

ضلع انتظامیہ کے مطابق ندیوں کی آبی سطح میں مسلسل گراوٹ درج ہونے سے صورتِ حال معمول پر ہے۔ تمام پشتے محفوظ ہیں اور انتظامیہ کی جانب سے آبی سطح پر مسلسل نظر رکھی جا رہی ہے۔ متعلقہ محکموں کو بھی الرٹ رہنے کی ہدایات دی گئی ہیں۔ گنگا-جمنا کی آبی سطح میں آئی اس کمی سے ندی کے کنارے رہنے والے لوگوں کو راحت ملی ہے۔ انتظامیہ کی نگرانی اور ندیوں کی گھٹتی آبی سطح کے درمیان فی الحال پریاگ راج میں سیلاب کا کوئی فوری خطرہ نہیں ہے۔

ہندوستھان سماچار

---------------

ہندوستان سماچار / انظر حسن