واشنگٹن ،02اگست( ہ س)۔

امریکی ریاست ایڈاہو کے شہر ٹوئن فالز میں ایک مصروف تجارتی مرکز کے قریب اندھا دھند فائرنگ کے واقعے نے خوف و ہراس پھیلا دیا۔ فاسٹ فوڈ ریسٹورنٹ کے نزدیک پیش آنے والے اس واقعے میں تین افراد ہلاک جبکہ سات دیگر زخمی ہو گئے۔ پولیس کے مطابق حملہ آور بھی ہلاک ہو چکا ہے اور صورتحال اب مکمل طور پر قابو میں ہے۔

حکام کے مطابق فائرنگ کا واقعہ مقامی وقت کے مطابق دوپہر تقریباً 2 بج کر 30 منٹ پر اِن اینڈ آؤٹ برگر ریسٹورنٹ کے قریب پیش آیا، جو شہر کے ایک انتہائی مصروف شاپنگ اور تجارتی علاقے میں واقع ہے۔ واقعے کی اطلاع ملتے ہی پولیس، امدادی ٹیمیں اور دیگر قانون نافذ کرنے والے ادارے فوری طور پر جائے وقوعہ پر پہنچ گئے۔

ٹوئن فالز کے ترجمان نے بتایا کہ ایک مسلح شخص نے اچانک فائرنگ شروع کر دی، جس کے نتیجے میں متعدد افراد گولیوں کی زد میں آ گئے۔ پولیس نے فوری کارروائی کرتے ہوئے علاقے کا محاصرہ کر لیا اور شہریوں کو محفوظ مقامات پر منتقل کیا۔

پولیس چیف میتھیو ہکس نے میڈیا کو بتایا کہ حملہ آور اب ہلاک ہو چکا ہے، جس کے بعد عوام کے لیے کسی مزید خطرے کی اطلاع نہیں۔ تاہم انہوں نے کہا کہ واقعے میں ہلاک اور زخمی ہونے والوں کی حتمی تعداد کی تصدیق تحقیقات مکمل ہونے کے بعد کی جائے گی۔شہر کے میڈیا رابطہ کار جوش پالمر نے خبر رساں ادارے رائٹرز کو بتایا کہ فائرنگ کے نتیجے میں تین افراد جان کی بازی ہار گئے جبکہ سات افراد زخمی ہوئے، جنہیں فوری طور پر قریبی اسپتالوں میں منتقل کر دیا گیا۔ زخمیوں کی حالت کے بارے میں فوری طور پر مزید تفصیلات جاری نہیں کی گئیں۔

پولیس کا کہنا ہے کہ حملہ آور کی شناخت اور اس کے ممکنہ محرکات جاننے کے لیے تفتیش جاری ہے۔ تاحال یہ واضح نہیں ہو سکا کہ واقعہ ذاتی دشمنی کا نتیجہ تھا یا کسی اور مقصد کے تحت انجام دیا گیا۔ٹوئن فالز پولیس ڈیپارٹمنٹ نے سوشل میڈیا پر جاری بیان میں بتایا کہ فائرنگ کی اطلاع ملتے ہی احتیاطی تدابیر کے طور پر علاقے کی اہم سڑکیں اور قریبی پل عارضی طور پر بند کر دیے گئے تھے، تاہم سکیورٹی کلیئرنس کے بعد صورتحال بتدریج معمول پر لائی جا رہی ہے۔امریکی حکام نے شہریوں سے اپیل کی ہے کہ وہ افواہوں سے گریز کریں اور تحقیقات مکمل ہونے تک صرف سرکاری ذرائع سے جاری ہونے والی معلومات پر اعتماد کریں۔

ہندوستھان سماچار

ہندوستان سماچار / Mohammad Khan