جموں, 16 اگست (ہ س)۔

جموں و کشمیر کے لیفٹیننٹ گورنر منوج سنہا نے کہا ہے کہ جموں و کشمیر میں امن خراب کرنے کی کوششوں پر لوگوں کو پریشان ہونے کی ضرورت نہیں، کیونکہ انتظامیہ اور سیکورٹی فورسز امن برقرار رکھنے کے لیے پوری طرح پرعزم ہیں۔جموں میں کشمیری پنڈت رضاکاروں کی سالانہ تقریب سے خطاب کرتے ہوئے ایل جی نے کہا کہ جموں و کشمیر میں امن و امان کو متاثر کرنے کی کوششیں جاری ہیں، تاہم ان سے نمٹنے کے لیے ضروری اقدامات کیے جا رہے ہیں۔

انہوں نے کہا کہ بعض عناصر افواہیں پھیلا رہے ہیں، لیکن عوام کو یقین دلانا چاہتا ہوں کہ انتظامیہ اور سیکورٹی فورسز امن برقرار رکھنے کے لیے مکمل طور پر پرعزم ہیں۔ امن خراب کرنے کی کوشش کرنے والوں کو اپنے عزائم میں کامیاب نہیں ہونے دیا جائے گا۔منوج سنہا نے کہا کہ جموں و کشمیر کو کئی چیلنجز کا سامنا ہے، لیکن گزشتہ برسوں میں صورتحال میں نمایاں تبدیلی آئی ہے۔ انہوں نے کہا کہ ایک وقت میں یہ تاثر تھا کہ جموں و کشمیر میں کوئی قومی پرچم اٹھانے کے لیے تیار نہیں ہوگا، تاہم آج بڑی تعداد میں لوگ ترنگا اٹھانے کے لیے آگے آ رہے ہیں، جو تبدیلی کی واضح مثال ہے۔

کشمیری پنڈتوں کے ریلیف میں اضافے کے مطالبے پر لیفٹیننٹ گورنر نے کہا کہ حکومت مسائل کے حل کے لیے مسلسل کوششیں کر رہی ہے۔ بعض معاملات فوری طور پر حل نہیں ہوسکتے، تاہم قابلِ حل تمام مسائل کو جلد از جلد نمٹانے کی کوشش جاری ہے۔اس سے قبل کے پی وی کے بانی وکرم کول نے حکومت سے کشمیری پنڈتوں کے ماہانہ ریلیف میں اضافہ کرنے اور وادی میں تعینات پنڈت ملازمین کے لیے طویل مدتی سیکورٹی یقینی بنانے کا مطالبہ کیا۔ انہوں نے سیکورٹی خدشات کا حوالہ دیتے ہوئے جموں و کشمیر کی ریاستی حیثیت بحال نہ کرنے کی بھی اپیل کی۔

ہندوستھان سماچار

---------------

ہندوستان سماچار / محمد اصغر