تیز رفتار ڈمپر کی زد میں آ کر معصوم بچی اور نوجوان کی موت، مشتعل ہجوم نے سڑک جام کیا

متھرا، 16 اگست (ہ س)۔

تھانہ صدر بازار کے علاقے قصبہ اورنگ آباد میں اتوار کی صبح ایک المناک سڑک حادثے میں تیز رفتار ڈمپر نے قہر برپا کر دیا۔ ایک تیز رفتار ڈمپر کے ڈرائیور نے لاپروائی سے گاڑی چلاتے ہوئے سڑک کنارے کھڑے افراد اور موٹر سائیکل سواروں کو زوردار ٹکر مار دی۔ اس دردناک حادثے میں ایک معصوم بچی اور ایک نوجوان کی موقع پر ہی موت ہو گئی، جبکہ ایک خاتون شدید زخمی ہو گئیں۔

عینی شاہدین اور پولیس کے مطابق اتوار کی صبح تقریباً 8.10 بجے کچھ افراد اور بچے بک اسٹور کی دکان سے سامان لے رہے تھے اور دو موٹر سائیکلیں وہاں کھڑی تھیں۔ اسی دوران متھرا کی طرف سے آنے والے بے قابو ڈمپر نے پانچ افراد کو اپنی زد میں لے لیا۔ حادثے میں جاں بحق ہونے والوں کی شناخت آئرا (عمر تقریباً 7-6 سال)، ساکن بازار اورنگ آباد، تھانہ صدر بازار، اور پرشانت کنتل (عمر تقریباً 20 سال)، ساکن شری جی وہار کالونی، تھانہ صدر بازار کے طور پر ہوئی۔ اس کے علاوہ پرشانت کی 52 سالہ والدہ گیتا دیوی اس حادثے میں شدید زخمی ہو گئیں، جنہیں فوری طور پر اسپتال میں داخل کرایا گیا۔ دو دیگر افراد کو بھی معمولی چوٹیں آئی ہیں۔

حادثے کے فوراً بعد ڈرائیور ڈمپر کو موقع پر ہی چھوڑ کر فرار ہو گیا۔ اس خوفناک حادثے سے مشتعل مقامی لوگوں نے انصاف اور تحفظ کے مطالبے کو لے کر اورنگ آباد روڈ پر جام لگا دیا، جس سے سڑک پر گاڑیوں کی لمبی قطاریں لگ گئیں اور تقریباً ڈیڑھ گھنٹے تک ٹریفک کی آمد و رفت مکمل طور پر مسدود رہی۔

اطلاع ملتے ہی تھانہ صدر بازار کی پولیس موقع پر پہنچی۔ پولیس نے مشتعل ہجوم کو سمجھا بجھا کر پرامن کیا اور ٹریفک بحال کرایا۔ تھانہ انچارج نے بتایا کہ دونوں لاشوں کو تحویل میں لے کر آگے کی قانونی کارروائی اور حادثے کی جانچ شروع کر دی گئی ہے۔

ہندوستھان سماچار

---------------

ہندوستان سماچار / انظر حسن