میامی، 04 جولائی (ہ س)۔ فیفا ورلڈ کپ 2026 کے راؤنڈ آف 16 میں موجودہ چیمپئن ارجنٹینا کے خلاف سنسنی خیز مقابلے میں شکست کے باوجود کیپ ورڈے نے دنیا کو یہ پیغام دیا کہ جذبے اور اعتماد کے بل پر چھوٹے ممالک بھی فٹبال کی بڑی طاقتوں کو چیلنج کر سکتے ہیں۔

محض پانچ لاکھ سے کچھ زیادہ آبادی والے افریقہ کے مغربی ساحل کے چھوٹے جزیرہ نما ملک کیپ ورڈے نے عالمی چیمپئن ارجنٹینا کو اضافی وقت تک سخت مقابلہ دیا۔

آخرکار 111ویں منٹ میں ڈینی بورجیس کے آٹو گول کی بدولت ارجنٹینا نے 3-2 سے کامیابی حاصل کی۔

میچ کے بعد کیپ وردے کے ڈیفنڈر پیکو لوپس نے کہا کہ ان کی ٹیم نے دنیا کو دکھا دیا ہے کہ چھوٹے ممالک کے لیے بھی کچھ ناممکن نہیں۔

انہوں نے صحافیوں سے گفتگو کرتے ہوئے کہا، ہم یہ دکھانا چاہتے تھے کہ چھوٹے ممالک بھی بڑے خواب دیکھ سکتے ہیں۔ اگر دل بڑا ہو اور یقین مضبوط ہو تو کچھ بھی ممکن ہے۔ امید ہے ہماری ٹیم نے کیپ وردے کے نوجوان کھلاڑیوں کو متاثر کیا ہوگا۔ ہم نے ثابت کیا ہے کہ دنیا کی بہترین ٹیموں کے خلاف بھی مقابلہ کیا جا سکتا ہے۔

40 سالہ گول کیپر ووزینہا اس ورلڈ کپ کے نمایاں ترین کھلاڑیوں میں شامل رہے۔ اسپین کے خلاف پہلے میچ میں ان کی شاندار کارکردگی کے بعد سوشل میڈیا پر ان کے فالوورز کی تعداد تقریباً 50 ہزار سے بڑھ کر 1.9 کروڑ سے زیادہ ہو گئی۔

انہوں نے کہا، ورلڈ کپ میں کھیلنا ہمارے پورے ملک کا خواب تھا۔ ہم اگلے مرحلے میں پہنچنا چاہتے تھے، لیکن ہمیں اپنے کھیل پر فخر ہے۔ ہم نے عالمی چیمپئن کے خلاف پوری طاقت سے مقابلہ کیا اور سر بلند کر کے میدان سے باہر آئے۔

لیونل میسی کے شاندار گول سے پیچھے ہونے کے باوجود کیپ وردے نے ہار نہیں مانی۔ ڈیرائے ڈوارٹے نے دوسرے ہاف میں برابری کا گول کر کے میچ کو اضافی وقت تک پہنچا دیا۔

اس کے بعد ارجنٹینا کے لیے لِساندرو مارٹینیز نے دوبارہ برتری حاصل کی، لیکن سڈنی لوپس کیبرال کے شاندار گول نے ایک بار پھر مقابلہ برابر کر دیا۔ تاہم آخر میں ڈینی بورجیس کا آٹو گول کیپ وردے کے خواب توڑ گیا۔

آئرلینڈ کے کلب شیمرک روورز سے کھیلنے والے پیکو لوپس نے کہا کہ اس ورلڈ کپ نے کیپ وردے کو عالمی شناخت دی ہے۔

انہوں نے کہا، جب ہم نے ورلڈ کپ کے لیے کوالیفائی کیا تھا تو ہمارا مقصد دنیا کو یہ دکھانا تھا کہ ہم یہاں کھیلنے کے حق دار ہیں۔ اب کسی کو یہ پوچھنے کی ضرورت نہیں پڑے گی کہ کیپ وردے کہاں ہے۔ دنیا اب ہمارے ملک اور ہماری ٹیم کو جانتی ہے۔ ہم نے آنے والی نسل کے لیے راستہ دکھا دیا ہے۔

ہندوستھان سماچار

---------------

ہندوستان سماچار / عبدالواحد