کشن گنج، 4 جولائی (ہ س)۔ضلع میں صدر تھانہ علاقہ کے کھگرا ریڈ لائٹ علاقہ میں ہفتہ کے روز پولیس نے چھاپہ ماری کر کے غیر اخلاقی سرگرمیوں کے خلاف کارروائی کی۔ خفیہ اطلاع پر کارروائی کرتے ہوئے پولیس نے 22 لڑکیوں کو حراست میں لیا اور جائے وقوعہ سے دو سے تین نوجوانوں کو گرفتار کر لیا۔پولیس معاملے میں ملوث تمام افراد سے پوچھ گچھ کر رہی ہے۔ اطلاعات کے مطابق پولیس کو کھگرا علاقے میں کافی عرصے سے غیر اخلاقی سرگرمیوں کی شکایتیں موصول ہو رہی تھیں۔ جس کے بعد ٹاؤن تھانہ نے ایک خصوصی ٹیم تشکیل دی اور ہفتے کے روز علاقے کے متعدد مقامات پر بیک وقت چھاپہ ماری کی۔ چھاپہ ماری کے دوران کئی کمروں کی تلاشی لی گئی اور وہاں موجود لوگوں سے پوچھ گچھ کی گئی۔ ابتدائی تحقیقات سے معلوم ہوا ہے کہ حراست میں لی گئی لڑکیوں میں سے کچھ نابالغ بھی ہو سکتی ہیں۔ پولیس ان کی شناخت اور عمر کی تصدیق کر رہی ہے۔ تفتیش کے دوران اگر کوئی نابالغ پایا گیا تو متعلقہ قوانین کے تحت سخت قانونی کارروائی کی جائے گی۔ اس پورے نیٹ ورک میں کس کا کردار تھا اس کی بھی تحقیقات کی جا رہی ہیں۔ معاملے میں کرشنا خلیفہ کا نام بھی آیا ہے۔ مقامی طور پر یہ دعوے کیا جارہا ہے کہ وہ پہلے ہی جیل میں ہے اور مبینہ طور پر اپنے ساتھیوں کے ذریعے وہاں سے یہ نیٹ ورک چلا رہا تھا۔ تاہم پولیس نے ابھی تک باضابطہ طور پر اس کی تصدیق نہیں کی ہے اور کہا ہے کہ یہ تحقیقات کا معاملہ ہے۔پولیس حکام کے مطابق معاملے کی ہر پہلو سے تفتیش کی جا رہی ہے۔ حراست میں لیے گئے تمام افراد سے پوچھ گچھ جاری ہے۔ اس نیٹ ورک سے منسلک دیگر مشتبہ افراد کی شناخت اور گرفتاری کے لیے بھی مہم جاری ہے۔ معاملے میں مزید قانونی کارروائی جاری ہے۔ہندوستھان سماچار

ہندوستان سماچار / Mohammad Afzal Hassan