پاور سیکٹر میں اس کامیابی سے ریاست کے وقار میں ہوا اضافہ: وزیر توانائی تومر

اندور، 04 جولائی (ہ س)۔

مدھیہ پردیش پاور ٹرانسمیشن کمپنی (ایم پی ٹرانسکو) کے جبل پور میں واقع اسٹیٹ لوڈ ڈسپیچ سینٹر (ایس ایل ڈی سی) کو انفارمیشن سیکورٹی مینجمنٹ سسٹم کے لیے آئی ایس او/آئی ای سی 27001:2022 بین الاقوامی سرٹیفیکیشن حاصل ہوا ہے۔

مدھیہ پردیش کے وزیر توانائی پردیومن سنگھ تومر نے ہفتہ کو بتایا کہ ملک کے بڑے اسٹیٹ لوڈ ڈسپیچ سینٹرز میں یہ سرٹیفیکیشن حاصل کرنے والا مدھیہ پردیش ایس ایل ڈی سی، جبل پور صفِ اول کا سینٹر ہے۔ یہ سرٹیفیکیشن دہلی میں واقع تنظیم ’کوالٹی ایشیا سرٹیفیکیشن‘ کے ذریعے تفصیلی تشخیص اور آڈٹ کے بعد دیا گیا ہے۔ تشخیص میں اسٹیٹ لوڈ ڈسپیچ سینٹر کے انفارمیشن سیکیورٹی مینجمنٹ سسٹم کو آئی ایس او/آئی ای سی 27001:2022 کی ضروریات کے مطابق پایا گیا۔ انہوں نے کہا کہ ریاست کے لئے قابل فخر اس کامیابی سے پاور سیکٹر میں ریاست کے وقار میں بھی اضافہ ہوا ہے۔

تومر نے بتایا کہ فی الحال بجلی کا گرڈ آپریشن پوری طرح سے ڈیجیٹل سسٹمز اور کمیونیکیشن نیٹ ورک پر منحصر ہے۔ ایسے میں انفارمیشن سیکیورٹی، سائبر سیکیورٹی اور آپریشنل ڈیٹا کی رازداری اور دستیابی کو یقینی بنانا انتہائی ضروری ہے۔ یہ سرٹیفیکیشن اسٹیٹ لوڈ ڈسپیچ سینٹر، جبل پور میں انفارمیشن سیکیورٹی کے خطرات کے انتظام کے لیے بین الاقوامی معیار کے مطابق انتظامات کو جانچنے کے بعد جاری کیا گیا ہے۔ اس سے مدھیہ پردیش کے بجلی نظام کے آپریشن میں انفارمیشن سیکیورٹی کے معیارات مزید مضبوط ہونے کے ساتھ ساتھ قومی سطح پر ایم پی ٹرانسکو کو ایک نئی پہچان ملی ہے۔

ایڈیشنل چیف انجینئر اور چیف انفارمیشن سیکیورٹی آفیسر راجیش گپتا نے معلومات دی کہ اس سرٹیفیکیشن کے دائرے میں اسٹیٹ لوڈ ڈسپیچ سینٹر کا تمام عملہ (مستقل اور آوٹ سورس ملازمین)، طریقہ کار اور معلوماتی اثاثے شامل ہیں۔ اس کے تحت ریئل ٹائم گرڈ آپریشن (حقیقی وقت کا گرڈ آپریشن)، بجلی کے نظام کی شیڈولنگ، نگرانی اور کنٹرول، مواصلاتی نظام، آئی ایس ڈی اور آئی ایس پی سے متعلق سرگرمیاں اور تمام آپریشنل ٹیکنالوجی و آئی ٹی (انفارمیشن ٹیکنالوجی) کا بنیادی ڈھانچہ شامل ہے، جنہیں سرٹیفیکیشن جاری کرنے سے پہلے باریکی سے جانچا گیا۔

ہندوستھان سماچار

---------------

ہندوستان سماچار / انظر حسن