جموں، 04 جولائی (ہ س)۔ سالانہ شری امرناتھ یاترا کے دوران ہفتہ کی صبح نیویوگ ٹنل کے قریب ایک یاتری کی اچانک طبیعت بگڑ گئی، جس کے بعد اسے فوری طور پر سب ڈسٹرکٹ اسپتال بانہال منتقل کیا گیا۔ سرکاری ذرائع کے مطابق مغربی بنگال کے ضلع نادیہ کے رہائشی پنکو دیوناتھ ولد نریش دیوناتھ کو سفر کے دوران سینے میں درد اور سانس لینے میں دشواری محسوس ہوئی۔ اطلاع ملتے ہی طبی عملے نے انہیں صبح تقریباً 9:30 بجے اسپتال پہنچایا، جہاں ڈاکٹروں نے معائنہ کے بعد بتایا کہ وہ دائمی پھیپھڑوں کی بیماری (سی او پی ڈی) میں مبتلا ہیں اور انہیں سانس لینے میں شدید دشواری کا سامنا ہے۔

ڈاکٹروں نے بروقت علاج کے بعد یاتری کی حالت کو مستحکم قرار دیا، تاہم طبی حالت کے پیش نظر انہیں بلند پہاڑی علاقوں میں مزید سفر نہ کرنے کی سخت ہدایت دی گئی۔

اس واقعے کے بعد محکمۂ صحت نے ایک بار پھر یاتریوں، خصوصاً سانس یا دل کے امراض میں مبتلا افراد، سے اپیل کی ہے کہ وہ امرناتھ یاترا پر روانہ ہونے سے قبل اپنا مکمل طبی معائنہ ضرور کرائیں تاکہ کسی بھی ناخوشگوار صورتحال سے بچا جا سکے۔

ہندوستھان سماچار

---------------

ہندوستان سماچار / محمد اصغر