علی گڑھ، 03 جولائی (ہ س)۔

علی گڑھ مسلم یونیورسٹی (اے ایم یو) کے شعبہ الیکٹرانکس انجینئرنگ کی طالبہ مس جوہی فریدی نے 11-12جون 2026 کو برطانیہ کے شہر برائٹن میں واقع یونیورسٹی آف سسیکس میں منعقدہ انٹرنیشنل نیورومورفک ہارڈویئر اینڈ الگورتھمز ورکشاپ میں بیسٹ پوسٹر ایوارڈ حاصل کرکے یونیورسٹی کا نام روشن کیا۔

پروفیسر محمد حسن اور پروفیسر عمر فاروق کی رہنمائی میں تحقیق کرنے والی جوہی فریدی کو آئی او پی پبلشنگ جرنل‘‘ نیورومورفک کمپیوٹنگ اینڈ انجینئرنگ’’ سے اعانت یافتہ مذکورہ ایوارڈ پیش کیا گیا۔ وہ اس اعزاز کو حاصل کرنے والی ایشیا کی واحد محقق تھیں۔ ورکشاپ میں ان کی شرکت یونیورسٹی آف سسیکس میں ڈاکٹر جیمز نائٹ کے تحت قائم انجینئرنگ اینڈ فزیکل سائنسز ریسرچ کونسل (ای پی ایس آر سی) کی فیلوشپ کے ذریعہ ممکن ہوئی۔

اس دستیابی کے بعد جوہی فریدی کو ہندوستان سے واحد مقرر کی حیثیت سے رے ڈولبی سینٹر، کیونڈش لیبارٹری، یونیورسٹی آف کیمبرج میں منعقدہ کیمبرج نیورو ورکس 2026 کانفرنس میں مدعو کیا گیا، جہاں انہوں نے ایف پی جی اے پر مبنی کلاؤڈ سے آزاد، دل کی بے قاعدہ دھڑکن (کارڈیئک اریتھمیا) کی تشخیص کے لیے ایک جدید ہارڈویئر-سافٹ ویئر کو ڈیزائن فریم ورک پیش کیا۔ اس دستیابی پر مسرت کا اظہار کرتے ہوئے جوہی فریدی نے اپنے اساتذہ پروفیسر محمد حسن اور پروفیسر عمر فاروق کا بطور خاص شکریہ ادا کیا اور پروجیکٹ کی کامیابی میں اپنے شریک مصنف اور ریسرچ کے شریک کار مسٹر محمد اریب حسنین کی خدمات کا بھی اعتراف کیا۔

ہندوستھان سماچار

ہندوستان سماچار / سید کامران علی گڑھ