بھوپال، 28 جولائی (ہ س)۔ مدھیہ پردیش کے مشہور ٹویشا شرما کی موت کے معاملے میں سی بی آئی کی خصوصی عدالت نے منگل کے روز دونوں اہم ملزمان ساس گری بالا سنگھ اور شوہر سمرتھ سنگھ کی عدالتی تحویل میں 11 اگست تک توسیع کر دی ہے۔ سماعت کے دوران ملزمان کی ویڈیو کانفرنسنگ کے ذریعے پیشی ہوئی۔ دفاعی فریق کی جانب سے وائس سیمپل کی کارروائی اور ریمانڈ میں توسیع پر اعتراض ظاہر کیا گیا، جسے عدالت نے مسترد کرتے ہوئے سی بی آئی کی درخواست قبول کر لی۔

بھوپال کے مشہور ٹویشا معاملے میں آج ڈیوٹی مجسٹریٹ کی عدالت میں سماعت ہوئی۔ ٹویشا فریق کے وکیل شبھانگ دیکشت نے بتایا کہ ضمانت کی درخواست مسترد ہونے کے بعد عدالتی تحویل کی مدت ختم ہونے پر ملزمہ گری بالا سنگھ اور ان کے بیٹے سمرتھ سنگھ کی ویڈیو کانفرنسنگ (وی سی) کے ذریعے عدالت میں پیشی کرائی گئی۔ سماعت کے دوران متوفیہ ٹویشا کے والد اور بھائی بھی عدالت کے احاطے میں موجود رہے۔ معاملے کی سنگینی اور تحقیقات کی حساسیت کو دیکھتے ہوئے عدالت نے سی بی آئی کی درخواست کو قبول کرتے ہوئے دونوں ملزمان کی جوڈیشل ریمانڈ میں 11 اگست تک توسیع کے احکامات جاری کیے۔

سماعت کے دوران ملزمان کے وکیل نے سی بی آئی پر الزام لگاتے ہوئے کہا کہ وائس سیمپل لینے کے دوران تفتیشی ایجنسی کے حکام کا رویہ مناسب نہیں تھا۔ دفاعی فریق نے یہ بھی دعویٰ کیا کہ ملزمان کی جانب سے تفتیش میں تعاون نہیں کرنے کی بات غلط ہے۔ اس پر عدالت نے زبانی طور پر واضح کیا کہ وائس سیمپل سے متعلق یہ تمام دلائل ضمانت کی درخواست کی سماعت کے دوران پہلے ہی سنے جا چکے ہیں، اس لیے ریمانڈ کے مرحلے میں اس مسئلے کا اب کوئی جواز نہیں رہ جاتا ہے۔

دفاعی فریق نے عدالت میں عدالتی تحویل کی مدت بڑھائے جانے کی مخالفت کرتے ہوئے دلیل دی کہ سی بی آئی کی ریمانڈ کی درخواست میں کوئی نیا جواز پیش نہیں کیا گیا ہے۔ ساتھ ہی انہوں نے ایجنسی سے اب تک پوچھ گچھ کیے گئے گواہوں کی فہرست مانگی۔ اس کی سخت مخالفت کرتے ہوئے سی بی آئی نے عدالت میں موقف رکھا کہ معاملے میں تفتیش ابھی حساس موڑ پر ہے اور گواہوں کی تفصیلات عام کرنے سے غیر جانبدارانہ تفتیش متاثر ہو سکتی ہے۔

قابلِ ذکر ہے کہ 12 مئی 2026 کو دارالحکومت بھوپال کے کٹارا ہلز میں ہوئی ٹویشا کی مشکوک موت کے معاملے میں ہائی کورٹ کے حکم پر دہلی ایمس کی دوبارہ پوسٹ مارٹم رپورٹ کی بنیاد پر سی بی آئی تفتیش کر رہی ہے۔

ہندوستھان سماچار

---------------

ہندوستان سماچار / انظر حسن