امپھال، 28 جولائی (ہ س)۔ منی پور میں سیکورٹی فورسز نے گزشتہ 24 گھنٹوں کے دوران الگ الگ کارروائیوں میں بڑی مقدار میں اسلحہ، گولہ بارود اور دھماکہ خیز مواد برآمد کیا ہے۔ یہ کارروائیاں امپھال ایسٹ اور بشنو پور اضلاع میں تلاشی مہم کے دوران کی گئیں۔ برآمد ہونے والے تمام اسلحہ اور دھماکہ خیز مواد کو قبضے میں لے کر تحقیقات کا آغاز کر دیا گیا ہے۔
منی پور پولیس کے مطابق، سیکورٹی فورسز نے منگل (28 جولائی) کو امپھال مشرقی ضلع کے سیزانگ چیراو چنگ علاقے کی پہاڑیوں میں بڑے پیمانے پر تلاشی مہم چلائی۔ سرچ آپریشن کے دوران ایک .303 رائفل، تین 12 بور سنگل بیرل گن، ایک .22 رائفل، ایک اینٹی رائٹ گن، تین مارٹر گولے، دو عدد 36 ہینڈ گرنیڈ، مختلف کیلیبر کے 43 زندہ کارتوس، تین ٹیرا سموک گرنیڈ،تین وائر لیس سیٹس اور ایک رائفل کی میگزین برآمد ہوئی۔
پولیس نے بتایا کہ ایک دن پہلے، 27 جولائی کو، سیکورٹی فورسز نے بشنو پور ضلع کے لوکتک تھانہ علاقے کے تحت لامدان اور گیلجنگ کے درمیان محاصرے اور تلاشی کی کارروائی شروع کی تھی۔ آپریشن کے دوران، دو میگزینوں کے ساتھ ایک اے کے-47 رائفل، ایک ڈبل بیرل بریچ لوڈنگ (ڈی بی بی ایل) بندوق، ایک گھریلو اسنائپر رائفل اور تین 9ایم ایم پستول، جن میں سے دو دیسی ساختہ تھے، برآمد کیے گئے۔
اس کے علاوہ، سیکورٹی فورسز نے ایک 51 ایچ ای مارٹر گولہ، دو نمبر 36 ایچ ای ہینڈ گرنیڈ، ایک ٹیوب لانچر کے ساتھ ایک ہینڈ گرنیڈ، ایک اینٹی رائٹ گرینیڈ، کئی میگزین، مختلف کیلیبرز کے کارتوس اور دیگر فوجی مواد قبضے میں لیا۔ پولیس کے مطابق برآمد ہونے والا اسلحہ اور دھماکہ خیز مواد بحفاظت قبضے میں لے لیا گیا ہے اور مزید تحقیقات شروع کر دی گئی ہیں۔
سیکورٹی ایجنسیوں کا کہنا ہے کہ ریاست میں تلاشی اور محاصرے اور تلاشی کی کارروائیاں غیر قانونی ہتھیاروں کی برآمدگی، عسکریت پسندوں کی سرگرمیوں کو روکنے اور امن و امان کو برقرار رکھنے کے مقصد سے جاری رہیں گی۔
ہندوستھان سماچار
---------------
ہندوستان سماچار / عبدالسلام صدیقی
