کھونٹی، 26 جولائی (ہ س)۔

کرا بلاک کے صدر پنچایت کے تحت لونکیل گاوں میں واقع دیوی منڈپ اورمہادیو منڈپ مندرمیں نامعلوم شرپسند عناصر کے ذریعہ توڑ پھوڑ کیے جانے کا معاملہ سامنے آیا ہے۔ واقعہ کے بعد دیہی باشندوں میں شدید غصہ ہے اور پولیس معاملے کی تحقیقات میں مصروف ہے۔

معلومات کے مطابق اتوار کی صبح مندر کے پجاری معمول کی پوجا ارچنا کے لیے پہنچے تو انہوں نے دیکھا کہ دیوی منڈپ کی دیوار پر لگے ٹائلز اور بھگوان کی تصویر کو نقصان پہنچایا گیا ہے۔ وہیں مہادیو منڈپ مندر میں لگی بجلی کی لائٹوں کے تاربھی کاٹ کر تباہ کر دیے گئے تھے۔ اس کے بعد پجاری نے فوری طور پر دیہی باشندوں کو اطلاع دی۔ بڑی تعداد میں دیہی باشندے مندر کے احاطے میں پہنچے اور واقعے پر شدید ناراضگی کا اظہار کیا۔

حادثے کی اطلاع ملتے ہی کرا تھانہ پولیس موقع پر پہنچی۔ تھانہ انچارج راجو کمار نے خود مندر کے احاطے کا معائنہ کیا اور صورتِ حال کا جائزہ لیا۔ انہوں نے کہا کہ معاملے کی سنجیدگی سے تحقیقات کی جا رہی ہے نیز واقعے میں ملوث افراد کی شناخت کر کے ان کے خلاف سخت کارروائی کی جائے گی۔ انہوں نے یقین دہانی کرائی کہ مجرموں کو کسی بھی قیمت پر بخشا نہیں جائے گا۔

حادثے کے بعد مقامی ہندو سماج کے لوگوں نے اسے ان کے مذہبی عقیدے سے جڑا سنجیدہ معاملہ بتاتے ہوئے شدید ناراضگی کا اظہار کیا۔ ان کا کہنا ہے کہ اس طرح کی حرکت سماجی ہم آہنگی کو بگاڑنے کی کوشش ہے اور مجرموں پر سخت کارروائی ہونی چاہیے۔

اس سلسلے میں پیر کی صبح 6.30 بجے مندر کے احاطے میں ہندو مذہبی عقیدت مندوں کا اجلاس طلب کیا گیا ہے۔ اجلاس میں زیادہ سے زیادہ لوگوں سے شامل ہونے کی اپیل کی گئی ہے۔ پولیس نے لوگوں سے امن و امان بنائے رکھنے اور افواہوں پر دھیان نہ دینے کی اپیل کرتے ہوئے کہا ہے کہ معاملے کی غیر جانبدارانہ تحقیقات کی جا رہی ہے۔

ہندوستھان سماچار

ہندوستان سماچار / انظر حسن