نئی دہلی، 20 جولائی (ہ س)۔

لارڈز میں تیسرے اور فیصلہ کن ون ڈے میں انگلینڈ کے خلاف شکست کے بعد، ہندوستانی کرکٹ کے سابق کپتان روہت شرما نے کہا کہ ٹیم نے ہدف کا تعاقب کرنے کی پوری کوشش کی، لیکن 20-25 رن پیچھے رہ گئے ۔ انہوں نے اعتراف کیا کہ شکست مایوس کن تھی تاہم ٹیم کو اس سے سبق سیکھ کر آگے بڑھنا چاہیے۔

بورڈ آف کنٹرول فار کرکٹ ان انڈیا (بی سی سی آئی) کی جانب سے پیر کو جاری کردہ ایک ویڈیو میں روہت شرما نے کہا کہ ٹیم پورے دورے میںاچھا کھیل رہی تھی، لیکن فیصلہ کن میچ میں ہدف سے پیچھے رہ گئی ۔ انہوں نے کہا، میں نتیجہ سے تھوڑا مایوس تھا کیونکہ مجھے لگا کہ ہم بہت اچھا کھیل رہے ہیں۔ برمنگھم میں ہمارا آغاز بہت اچھا تھا۔ کارڈف میں، بیٹنگ توقعات کے مطابق نہیں تھی اور بورڈ پر کافی رنز نہیں تھے۔ یہاں بھی بڑا ہدف تھا۔ ہم نے پوری کوشش کی، لیکن 20-25 رنز کم ہو گئے۔

لارڈز ون ڈے میں اہم فاسٹ بولر جسپریت بمراہ کی غیر موجودگی میں ہندوستانی بولنگ اٹیک دباو¿ میں نظر آیا۔ آخری تین اووروں میں 62 رنز دے کر، انگلینڈ نے 387 کا بڑا اسکور بنایا۔ تاہم، روہت نے نوجوان گیند بازوں کا دفاع کرتے ہوئے کہا کہ انہوں نے ابھی تک زیادہ ون ڈے کرکٹ نہیں کھیلا ہے۔ انہوں نے کہا کہ انہیں کچھ وقت درکار ہے۔ انہوں نے امید ظاہر کی کہ وہ اس میچ سے سیکھیں گے اور مستقبل میں بہتر کارکردگی کا مظاہرہ کریں گے۔

انگلینڈ میں کھیلنے کے حوالے سے سابق کپتان نے کہا کہ مجھے انگلینڈ میں کھیل کر بہت مزہ آتا ہے، ماحول، گراو¿نڈز اور پچز ہر بار نئے چیلنجز پیش کرتی ہیں، ایک کرکٹر کے طور پر آپ اس طرح کے چیلنجز کو ترستے ہیں، ذاتی طور پر میں نے اس سے لطف اٹھایا، لیکن جیسا کہ میں نے پہلے کہا، نتیجہ تھوڑا مایوس کن رہا، اب ہمیں آگے بڑھنا ہے اور دیکھنا ہے کہ ہم بحیثیت ٹیم کہاں بہتری لا سکتے ہیں۔ انہوں نے زور دے کر کہا کہ ٹیم کی کامیابی کا انحصار صرف انفرادی کارکردگی پر نہیں بلکہ اجتماعی کوششوں پر بھی ہے۔

روہت-وراٹ کی شراکت: لارڈز میں روہت شرما اور وراٹ کوہلی کے درمیان 113 رنز کی شراکت نے بھی نیا ریکارڈ قائم کردیا۔ یہ دونوں کے درمیان ون ڈے کرکٹ میں 21ویں صدی کی شراکت تھی۔ اس کے ساتھ، انہوں نے سری لنکا کے کمار سنگاکارا اور تلک رتنے دلشان (20 سنچری پارٹنرشپ) کو پیچھے چھوڑ کر آل ٹائم فہرست میں دوسری پوزیشن حاصل کی۔ اس فہرست میں سچن تیندولکر اور سوربھ گانگولی 26 سنچریوں کی شراکت کے ساتھ سرفہرست ہیں۔

روہت نے وراٹ کوہلی کے ساتھ اپنی تال میل کا ذکر کرتے ہوئے کہا کہ اتنے لمبے عرصے تک ایک ساتھ کھیلنے کے فوائد میدان پر صاف نظر آتے ہیں۔ انہوں نے کہا، ہم نے اپنا پورا کریئر ایک ساتھ کھیلا ہے۔ وراٹ کے ساتھ بلے بازی کرنا ہمیشہ خوشی کی بات ہے۔ ہم ایک دوسرے کے کھیل اور سوچ کو اچھی طرح سمجھتے ہیں۔ ہم اننگز کے دوران میچ کو آگے بڑھانے کے طریقے پر مسلسل بحث کرتے ہیں۔

لارڈز میں کھیلے گئے تیسرے اور آخری ون ڈے میں انگلینڈ نے بھارت کو 27 رنز سے شکست دے کر تین میچوں کی سیریز 2-1 سے جیت لی۔ انگلینڈ نے پہلے بیٹنگ کرتے ہوئے تین وکٹوں پر 387 رنز بنائے۔ جواب میں بھارتی ٹیم 50 اوورز میں سات وکٹوں کے نقصان پر صرف 360 رنز ہی بنا سکی۔ روہت شرما نے میچ میں 138 رنز کی شاندار اننگز کھیلی، کپتان شبھمن گل نے 77 اور وراٹ کوہلی نے 74 رنز بنائے۔ اس سے قبل ہندوستانی ٹیم کو پانچ میچوں کی ٹی ٹوئنٹی سیریز میں انگلینڈ کے ہاتھوں 4- 0 سے شکست کا سامنا کرنا پڑا تھا۔

ہندوستھان سماچار

ہندوستان سماچار / عطاءاللہ