نئی دہلی ، 19 جولائی(ہ س)۔ سینٹرل کنزیومر پروٹیکشن اتھارٹی(سی سی پی اے) نے ملک بھر میں 41 ریستوراں کے خلاف صارفین کی رضامندی کے بغیر سروس چارجزکو شامل کرنے پر از خود کارروائی شروع کی ہے۔ یہ کارروائی نیشنل کنزیومر ہیلپ لائن (این سی ایچ) پر موصول ہونے والی شکایات کی بنیاد پر کی گئی جو صارفین نے ان کی رضامندی کے بغیر سروس چارجز کے ساتھ بل جمع کرائے تھے۔

صارفین کے امور، خوراک اور عوامی تقسیم کی مرکزی وزارت نے اتوار کو کہا کہ سی سی پی اے کی تحقیقات سے پتہ چلا ہے کہ رضامندی کے بغیر سروس چارج شامل کرنا صارفین کے حقوق کی خلاف ورزی کرتا ہے۔ یہ ہوٹلوں اور ریستوراں میں سروس چارج کی وصولی سے متعلق سی سی پی اے رہنما خطوط اور کنزیومر پروٹیکشن ایکٹ 2019 کے سیکشن 2(47) کے تحت غیر منصفانہ تجارتی عمل کو تشکیل دیتا ہے ۔

اتھارٹی نے کہا کہ دہلی ہائی کورٹ نے اپنے 28 مارچ 2025 کے فیصلے میں سی سی پی اے کے رہنما خطوط کو برقرار رکھتے ہوئے واضح کیا کہ ریستوراں کے ذریعہ لازمی سروس چارج قانون کے مطابق نہیں ہے۔ عدالت نے تمام ہوٹلوں اور ریستوراں کو ان رہنما خطوط پر عمل کرنے کی ہدایت کی اور سی سی پی اے کو تعمیل کی نگرانی کرنے اور ضروری کارروائی کرنے کا اختیار دیا۔

ایک معاملے میں سی سی پی اے نے چایوس(سن شائن ٹی ہاوس پرائیویٹ لمیٹڈ) پر صارفین کی رضامندی کے بغیر بلوں میں سروس چارج شامل کرنے پر 50,000 کا جرمانہ عائد کیا ۔ کمپنی کو یہ بھی ہدایت کی گئی کہ وہ صارفین سے جمع کی گئی رقم واپس کرے اور اپنے تمام آؤٹ لیٹس پر بلنگ سسٹم میں ضروری تبدیلیاں کرے تاکہ مستقبل میں سروس چارجز یا اس سے ملتے جلتے چارجز خود بخود بلوں میں شامل نہ ہوں۔

اتھارٹی نے کیفے بلیو باٹل (پٹنہ) ، چائنا گیٹ ریسٹورنٹ پرائیویٹ لمیٹڈ سمیت کئی دیگر اداروں کے خلاف بھی حتمی احکامات جاری کیے ہیں۔ لمیٹڈ ، فیسٹا باربی کیو نیشن ، ایف او او احمد آباد ، ایل اوپیرا فرنچ بیکری پرائیویٹ لمیٹڈ، اور زورو لگژری نائٹ کلب ودیگرکے خلاف شکایات کی تحقیقات جاری ہیں۔

سی سی پی اے نے اس بات کا اعادہ کیا کہ، اس کے رہنما خطوط کے مطابق، کوئی ہوٹل یا ریستوراں خود بخود صارف کے بل میں سروس چارج شامل نہیں کر سکتا۔ اسے کسی اور نام سے جمع نہیں کیا جا سکتا۔ سروس چارج مکمل طور پر رضاکارانہ ہے اور صارفین کو اس کی ادائیگی کے لیے مجبور نہیں کیا جا سکتا۔ اگر کوئی صارف سروس چارج ادا کرنے سے انکار کرتا ہے، تو اسے سروس سے انکار یا داخلے سے روکا نہیں جا سکتا۔

اتھارٹی نے یہ بھی واضح کیا کہ سامان اور خدمات ٹیکس (جی ایس ٹی)سروس چارج پر نہیں لگایا جا سکتا ، کیونکہ یہ لازمی فیس نہیں ہے۔ سی سی پی اے نے صارفین سے اپیل کی ہے کہ اگر کوئی ریسٹورنٹ ان کی اجازت کے بغیر سروس چارج لیتا ہے تو وہ نیشنل کنزیومر ہیلپ لائن پر شکایت درج کریں ، تاکہ غلطی کرنے والے اداروں کے خلاف ضروری کارروائی کی جاسکے۔

ہندوستھان سماچار

ہندوستان سماچار / Mohammad Khan