ملک اور بیرونِ ملک کے صنعتی شعبے، سرمایہ کاروں اور پالیسی ماہرین کا سنگم ہوگا

بھوپال، 12 جولائی (ہ س)۔

مدھیہ پردیش کے وزیر اعلیٰ ڈاکٹر موہن یادو پیر، 13 جولائی کو راجدھانی بھوپال میں ’ایم پی ٹیک گروتھ کانکلیو 3.0: جی سی سی، ڈیٹا سینٹر اور سیمی کنڈکٹر‘ کا افتتاح کریں گے۔ ساتھ ہی وہ ریاستی حکومت کے ٹیکنالوجی پر مبنی صنعتی ترقی کے وژن کو شیئر کر کے صنعتی شعبے کے نمائندوں کے ساتھ ون ٹو ون میٹنگ کریں گے اور سرمایہ کاری، منصوبوں کے نفاذ اور مستقبل کے تعاون کے امکانات پر تبادلۂ خیال کریں گے۔

پبلک ریلیشن آفیسر جوہی شریواستو نے اتوار کے روز بتایا کہ وزیر اعلیٰ ڈاکٹر یادو کانکلیو کے احاطے میں منعقدہ نمائش کا معائنہ بھی کریں گے۔ محکمہ سائنس اور ٹیکنالوجی کی جانب سے منعقدہ ٹیک گروتھ کانکلیو 3.0 کا مقصد اعلیٰ ترقی والے ٹیکنالوجی کے شعبوں میں سرمایہ کاری کو تیز کرنا اور گلوبل کیپبلٹی سینٹر (جی سی سی)، ڈیٹا سینٹر اور سیمی کنڈکٹر کے شعبے میں ریاست کو ملک کی اہم سرمایہ کاری کی منزلوں کے طور پر قائم کرنا ہے۔

انہوں نے بتایا کہ کانکلیو میں مدھیہ پردیش کے ٹیکنالوجی کے ترقیاتی سفر پر ایک خصوصی پیشکش دی جائے گی۔ ساتھ ہی سرکردہ کمپنیوں کے ماہرین جی سی سی کی توسیع، ڈیٹا سینٹر کی ترقی اور سیمی کنڈکٹر ایکو سسٹم سے جڑے مواقع پر اپنے خیالات کا اظہار کریں گے۔ پروگرام میں مختلف حکمتِ عملی پر مبنی شراکت داریوں اور معاہدوں کا تبادلہ بھی کیا جائے گا، جو ریاست کے ٹیکنالوجی ایکو سسٹم کو مزید بااختیار بنانے میں اہم کردار ادا کریں گے۔

کانکلیو میں سیمی کنڈکٹر، گلوبل کیپبلٹی سینٹرز اور ڈیٹا سینٹرز کے موضوعات پر مرکوز راؤنڈ ٹیبل مباحثے منعقد ہوں گے۔ ان میں سینئر صنعتی نمائندے، پالیسی ساز اور ماہرینِ تعلیم ریاست میں سرمایہ کاری کے امکانات، ہنر مند افرادی قوت، صنعتی انفراسٹرکچر، پالیسی تعاون اور مستقبل کی ضروریات پر غور و خوض کریں گے۔ بحث کے اہم موضوعات میں مدھیہ پردیش میں مربوط الیکٹرانکس اور سیمی کنڈکٹر ایکو سسٹم کی ترقی، ریاست کو بھارت کی اگلی اہم جی سی سی منزل کے طور پر قائم کرنا اور ڈیجیٹل انفراسٹرکچر کو مضبوط بنانا شامل ہے۔

پبلک ریلیشن آفیسر نے بتایا کہ کانکلیو میں ملک اور بیرونِ ملک کی سرکردہ ٹیکنالوجی کمپنیوں، صنعتی تنظیموں، سرمایہ کاروں، اسٹارٹ اپس، انکیوبیٹرز، تحقیقی و تعلیمی اداروں اور پالیسی ماہرین سمیت مختلف شعبوں کے نمائندے شریک ہوں گے۔ سی ٹی آر ایل ایس ڈیٹا سینٹرز، کینس ٹیکنالوجیز، فوبیاما پاور اور نیوبولٹ لمیٹڈ سمیت کئی معتبر اداروں کے نمائندے مختلف تکنیکی شعبوں میں سرمایہ کاری اور تعاون کے امکانات پر اپنے خیالات کا اظہار کریں گے۔ اہم تعلیمی ادارے بھی اختراع، تحقیق، مہارت کی ترقی اور صنعت و تعلیم کے باہمی تعاون پر منعقدہ سیشنز میں حصہ لیں گے۔

انہوں نے بتایا کہ ایم پی ٹیک گروتھ کانکلیو کے پہلے دو ایڈیشنز نے ریاست میں ٹیکنالوجی کی سرمایہ کاری کو ایک نئی رفتار دی ہے۔ کانکلیو 1.0 میں 20 ہزار کروڑ روپے سے زیادہ کی سرمایہ کاری کی تجاویز موصول ہوئیں، جن سے تقریباً 75 ہزار روزگار کے مواقع پیدا ہوئے۔ کانکلیو 2.0 میں 12 ہزار کروڑ روپے سے زیادہ کی سرمایہ کاری حاصل ہوئی، جن سے تقریباً 48 ہزار روزگار کے مواقع پیدا ہوئے۔ کانکلیو 3.0 کا مقصد سرمایہ کاری کے اس سفر کو نئی بلندیوں تک پہنچاتے ہوئے حکمتِ عملی پر مبنی ٹیکنالوجی کے شعبوں میں صنعتوں کی شرکت کو مزید مضبوط بنانا ہے۔

ہندوستھان سماچار

---------------

ہندوستان سماچار / انظر حسن