نئی دہلی، 03 جون (ہ س)۔ بھارت نے کویت کے بین الاقوامی ہوائی اڈے پر ہونے والے حملے کی شدید مذمت کی ہے۔ اس حملے میں ایک بھارتی شہری ہلاک جبکہ دیگر متعدد افراد زخمی ہوئے ہیں۔

وزارتِ خارجہ نے بدھ کے روز جاری کردہ ایک بیان میں کہا کہ مغربی ایشیا میں جاری موجودہ تنازعہ کے آغاز سے ہی بھارت شہریوں اور شہری بنیادی ڈھانچے کو نشانہ بنانے کی مخالفت کرتا رہا ہے۔ حکومت حملے میں جان گنوانے والوں کے اہل خانہ سے گہری ہمدردی اور تعزیت کا اظہار کرتی ہے۔

وزارت کا کہنا ہے کہ بھارتی سفارت خانہ تمام زخمیوں کو ہر ممکن مدد فراہم کر رہا ہے۔ بھارتی شہریوں کی فلاح و بہبود کے لیے سفارت خانہ مقامی انتظامیہ کے ساتھ مسلسل رابطے میں ہے۔ خطے میں موجود بھارتی مشنز اور سفارتی مراکز مکمل طور پر چوکس ہیں اور بھارتی برادری کی مدد کے لیے فعال اقدامات کر رہے ہیں۔

قابلِ ذکر ہے کہ ایران پر امریکی حملوں کے جواب میں گزشتہ شب کویت بین الاقوامی ہوائی اڈے کے ٹرمینل 1 کو ایران کے ڈرون اور میزائل حملے کا نشانہ بنایا گیا۔ اس حملے میں ہوائی اڈے کو شدید نقصان پہنچا، ہوائی اڈے کے عملے اور مسافروں سمیت تقریباً 63 افراد زخمی ہوئے، جبکہ پروازوں کو معطل کرنا پڑا۔

ہندوستھان سماچار

---------------

ہندوستان سماچار / عبدالواحد