نئی دہلی، 3 جون (ہ س)۔ انفورسمنٹ ڈائریکٹوریٹ (ای ڈی) نے آندھرا پردیش کے مشہور تروپتی تروپتی دیوستھانم (ٹی ٹی ڈی) کے پرساد میں گھی میں ملاوٹ کے گھوٹالے سے جڑے منی لانڈرنگ کیس میں بدھ کے روز ملک بھر کے 15 مقامات پر چھاپے مارے۔

یہ چھاپے مہاراشٹر کے اہلیانگر، راجستھان کے بیکانیر، اتراکھنڈ کے دہرادون اور رُڑکی، دہلی، تمل ناڈو کے ڈنڈیگل، آندھرا پردیش کے گنٹور اور مہاراشٹر کے ممبئی سمیت مختلف شہروں میں کیے گئے۔

کارروائی کے دوران 60 لاکھ روپے نقد برآمد ہوئے اور 45 کروڑ روپے سے زائد مالیت کی جائیدادوں کے بارے میں انکشاف ہوا کہ وہ جرم کی کمائی سے حاصل کی گئی تھیں۔

ای ڈی نے بتایا کہ تلاشی کے دوران ملزمان پو مل جین، وپن جین، راجو راج شیکھرن، راجیش منسکھ لال چھاڑوا، اپورْو ونے کانت چھاڑوا، ماچندر شنکر راؤ لنکے، اجے کمار سنگندھ، مہیش کمار روہیرا اور آشیش اگروال کے گھروں اور دفاتر کی تلاشی لی گئی۔

اس کے علاوہ اے آر ڈیری فوڈ پرائیویٹ لمیٹڈ (ڈنڈیگل، تمل ناڈو)، مالگنگا ملک اینڈ ایگرو پروڈکٹس پرائیویٹ لمیٹڈ (اہلیانگر، مہاراشٹر) اور بھولے بابا آرگینک ڈیری ملک پرائیویٹ لمیٹڈ (رُڑکی، اتراکھنڈ) کے ڈیری پلانٹس پر بھی چھاپے مارے گئے۔

یہاں سے کئی مشکوک دستاویزات برآمد ہوئیں جن سے ظاہر ہوا کہ جرم کی کمائی کو چھپانے کے لیے پیچیدہ قانونی اداروں کا نیٹ ورک استعمال کیا گیا۔

تحقیقات میں سامنے آیا ہے کہ ملزمان نے بعض ٹی ٹی ڈی افسران کے ساتھ مل کر ملاوٹ شدہ گھی کی سپلائی کی اور ٹرسٹ کو دھوکہ دے کر نقصان پہنچایا۔ بعد میں اس جرم کی کمائی کو مختلف جائیدادوں میں سرمایہ کاری کیا گیا۔

ای ڈی نے کہا ہے کہ تحقیقات ابھی جاری ہیں۔

ہندوستھان سماچار

---------------

ہندوستان سماچار / عبدالواحد