وکٹوریہ (سیشلز)، 28 جون (ہ س)۔

ہندوستانی وزیر اعظم نریندر مودی اور سیشلز کے صدر پیٹرک ہرمنی، جنہوں نے سیشلز کی آزادی کی 50ویں سالگرہ کے موقع پر منعقد ہونے والی تقریبات میں بطور مہمان خصوصی شرکت کی، کہا کہ ہندوستان اور سیشلز کے تعلقات بہت مضبوط ہیں۔ دونوں ملک مل کر ترقی کریں گے اور کامیاب ہوں گے۔ ہرمنی نے وزیر اعظم مودی کے اعزاز میں اسٹیٹ ہاو¿س میں عشائیہ دیا۔

سیشلز نیوز ایجنسی کے مطابق صدر ہرمنی نے سیشلز اور ہندوستان کے درمیان مضبوط اور دیرینہ تعلقات کا اعادہ کیا۔ ہرمنی نے کہا، ہندوستان سیشلز کا ایک مضبوط دوست رہا ہے، اور ہمارے لوگوں اور یہاں کی ہندوستانی برادری نے دل و جان سے اس دوستی کو قبول کیا ہے۔

وزیر اعظم مودی نے اس موقع پر خطاب کرتے ہوئے کہا، ہندوستان اور سیشلز کے درمیان دوستی مستقل طور پر مضبوط ہوئی ہے اور دیرینہ ہے۔ ایک ساتھ مل کر ہم ترقی کریں گے اور کامیاب ہوں گے۔ سیشلز کے صدر نے کہا کہ ہندوستان انفراسٹرکچر، دفاع، صحت اور بحری سلامتی سمیت کئی شعبوں میں ترقی کے لیے پرعزم شراکت دار رہا ہے۔ یہ سال دونوں ممالک کے لیے بہت اہم ہے، کیونکہ 2026 میں سیشلز اور ہندوستان کے درمیان سفارتی تعلقات کی 50ویں سالگرہ ہے۔ یہ شراکت داری جمہوری اقدار، سمندری تعاون اور عوام سے عوام کے گہرے تعلقات پر مبنی ہے۔

انہوں نے کہا کہ 29 جون کو سیشلز کے قومی دن کی تقریبات میں مہمان خصوصی کے طور پر ہندوستانی وزیر اعظم مودی کی موجودگی ہندوستان اور سیشلز کے تعلقات کی گہرائی اور مضبوطی کو ظاہر کرتی ہے۔ دونوں ممالک اب اگلے 50 سال کی شراکت کے منتظر ہیں۔

بھارتی وزیر اعظم مودی نے سیشلز کے نیشنل بوٹینیکل گارڈن کا بھی دورہ کیا اور کوکو ڈی میر کا پودا بطور یادگار لگایا۔ بھارتی وزیراعظم نریندر مودی ہفتے کی صبح وکٹوریہ پہنچے۔ سیشلز پہنچنے پر وزیر اعظم نریندر مودی کا سرکاری طور پر سیشلز کے صدر پیٹرک ہرمنی نے استقبال کیا۔ یہ دورہ مضبوط دوستی اور دیرینہ شراکت داری کا ثبوت ہے جس نے 1976 میں آزادی کے بعد سے سیشلز اور ہندوستان کو باندھ رکھا ہے۔

واضح رہے کہ اس سے قبل ہفتہ کو وزیر اعظم مودی جب سیشلز پہنچے تو ان کا ثقافتی پروگرام کے ساتھ استقبال کیا گیا۔ وہ گجرات کے کچھ کے ایک لوک رقص سے لطف اندوز ہوئے۔

سیشلز حکومت نے کہا کہ ہندوستان سیشلز کے سب سے قریبی اور اہم ترقیاتی شراکت داروں میں سے ایک ہے۔ ہندوستان نے بنیادی ڈھانچے، صحت، تعلیم اور کمیونٹی کی ترقی سے متعلق متعدد منصوبوں میں مدد کی ہے، اور بحر ہند کے علاقے میں امن، سلامتی اور استحکام کو فروغ دینے کے لیے سیشلز کے ساتھ مل کر کام کیا ہے۔ یہ دورہ دونوں ممالک کے درمیان قریبی اور تاریخی تعلقات کی تصدیق کرتا ہے۔ وزیر اعظم مودی کا سیشلز کا آخری سرکاری دورہ 10-11 مارچ 2015 کو ہوا تھا۔

ہندوستھان سماچار

ہندوستان سماچار / عطاءاللہ