جموں، 27 جون (ہ س)۔

تین جولائی سے شروع ہونے والی سالانہ امرناتھ یاترا کے پیش نظر ضلع اُدھم پور میں انتظامیہ نے تیاریوں کو حتمی شکل دینا شروع کر دی ہے۔ یاتریوں کی سلامتی اورسہولت کو یقینی بنانے کے لیے سیکورٹی سمیت تمام متعلقہ محکموں کو الرٹ کر دیا گیا ہے۔ہفتہ کے روز اُدھم پور میں جموں و کشمیر پولیس، سی آر پی ایف، فوج اور ڈیزاسٹر مینجمنٹ کی ٹیموں نے مشترکہ طور پر ایک جامع موک ڈرل کا انعقاد کیا۔ اس دوران ریلوے اسٹیشن، بس اسٹینڈ اور قومی شاہراہ کے حساس مقامات پر ممکنہ ہنگامی صورتحال سے نمٹنے کی عملی مشق کی گئی۔

موک ڈرل میں بم ڈسپوزل اسکواڈ، ڈاگ اسکواڈ اور کوئیک ریسپانس ٹیم نے بھی حصہ لیا اور مختلف ایمرجنسی حالات میں فوری کارروائی کی صلاحیت کا مظاہرہ کیا۔ادھر، ڈپٹی کمشنر اُدھم پور نے تمام متعلقہ محکموں کو چوبیس گھنٹے الرٹ رہنے کی ہدایت دیتے ہوئے بجلی، پانی، صفائی اور طبی سہولیات کی فراہمی کو یقینی بنانے پر زور دیا۔ انتظامیہ نے واضح کیا ہے کہ آر ایف آئی ڈی کارڈ کے بغیر کسی بھی یاتری کو آگے جانے کی اجازت نہیں دی جائے گی۔

ہندوستھان سماچار

ہندوستان سماچار / محمد اصغر