نئی دہلی، 14 جون (ہ س)۔

اتراکھنڈ کی مختلف سماجی تنظیموں نے اتوار کو جنتر منتر پر مظاہرہ کرتے ہوئے مالویہ نگر آتشزدگی کیس میں گرفتار باورچی کیسر سنگھ نیگی کی رہائی اور منصفانہ تحقیقات کا مطالبہ کیا۔

احتجاج کے دوران جنتر منتر کا علاقہ ”کیسر سنگھ نیگی کے لیے انصاف“ کا مطالبہ کرنے والے نعروں سے گونج اٹھا۔ اس احتجاج میں بڑی تعداد میں سابق فوجیوں، ہوٹلوں کے کارکنوں، طلباء ، نوجوانوں اور دہلی این سی آر میں رہنے والے اتراکھنڈ نژاد لوگوں نے شرکت کی۔

احتجاج کا آغاز مالویہ نگر آتشزدگی میں اپنی جانیں گنوانے والوں اور حال ہی میں ہلاک ہونے والے معروف شوٹر جسپال سنگھ رانا کو خراج عقیدت پیش کرنے کے ساتھ شروع ہوا۔ اس کے بعد مظاہرین نے کیسر سنگھ نیگی کی حمایت میں آواز بلند کی اور معاملے کی منصفانہ تحقیقات کا مطالبہ کیا۔

احتجاج کی قیادت اتراکھنڈ لوک منچ کے صدر برج موہن اپریتی نے کی۔ اتراکھنڈ بھرتریہ منڈل، اتراکھنڈ ہوٹل آرگنائزیشن، اور گڑھوال ہٹاشی سبھا سمیت کئی سماجی تنظیموں نے احتجاج میں حصہ لیا۔ مظاہرین نے مرکزی وزیر داخلہ امیت شاہ کو ایک میمورنڈم بھی پیش کیا، جس میں معاملے کی غیر جانبدارانہ تحقیقات اور قانونی کارروائی کا مطالبہ کیا گیا۔

مظاہرین کا کہنا تھا کہ یہ معاملہ انتہائی حساس اور سنگین ہے۔ اس لیے تفتیش مکمل طور پر غیر جانبدارانہ، شفاف اور دستیاب شواہد کی بنیاد پر ہونی چاہیے۔ ان کا کہنا تھا کہ کسی شخص کو مجرم یا بے گناہ قرار دینے کا اختیار صرف عدالت کے پاس ہے لہٰذا تفتیشی اداروں کو انصاف کے اصولوں پر پوری طرح عمل کرنا چاہیے۔

پوسٹر اور بینرز اٹھائے ہوئے مظاہرین نے نیگی کی گرفتاری پر ناراضگی کا اظہار بھی کیا۔ ان کا کہنا تھا کہ کیسر سنگھ نیگی ایک ملازم ہے اور اس معاملے میں حقیقی احتساب ہونا چاہیے۔ احتجاج میں شریک پون کمار میتھانی نے کہا کہ تحقیقات غیر جانبدارانہ ہونی چاہیے تاکہ سچائی سامنے آسکے۔

ہندوستھان سماچار

ہندوستان سماچار / عطاءاللہ