کانپور، 7 مئی (ہ س)۔ اتر پردیش کے ضلع کانپور کے بدھنو تھانے کے علاقے کے تحت جمعرات کو مزدوروں کو لے جانے والی ایک نجی بس بے قابو ہو کر نہر میں گر گئی۔ اس واقعہ سے چاروں طرف چینخ و پکار مچ گئی ۔ مقامی لوگوں اور پولیس کی مدد سے ریسکیو آپریشن کیا گیا اور بس میں سوار 20 مزدوروں کو بحفاظت نکال لیا گیا۔ زخمیوں میں سے کچھ کو اسپتال میں داخل کرایا گیا، جب کہ بس ڈرائیور موقع سے فرار ہوگیا۔

اسسٹنٹ پولیس کمشنر گھاٹم پور کرشن کانت یادو نے بتایا کہ بس گھاٹم پور کے کڑھنی سے مزدوروں کو رنیہ کی ایک فیکٹری میں لے جا رہی تھی۔ جب یہ نہر پر پہنچی تو بس اچانک بے قابو ہو کر نہر میں جاگری۔ عینی شاہدین کے مطابق بس ڈرائیور موقع سے فرار ہوگیا، جب کہ بس میں سوار دیگر 20 کارکن ڈوبنے لگے۔ اس کے بعد جائے وقوعہ پر موجود لوگوں نے پولیس کو اطلاع دی اور خود ریسکیو آپریشن شروع کیا اور ایک ایک کرکے تمام کارکنوں کو بحفاظت باہر نکالا۔ تاہم اس واقعے میں کچھ کارکن زخمی ہوئے ہیں جنہیں ابتدائی طبی امداد کے لیے اسپتال میں داخل کرایا گیا ہے۔

واقعہ کو سنجیدگی سے لیتے ہوئے پولیس کی ایک ٹیم اور فائر انجن کو جائے وقوعہ پر بلایا گیا۔ چیف فائر آفیسر (سی ایف او) دیپک شرما کی نگرانی میں بس کو کرین کی مدد سے باہر نکالا گیا۔ انہوں نے مزید کہا کہ جائے وقوعہ پر امن و امان برقرار ہے۔ شکایت کی بنیاد پر مزید قانونی کارروائی کی جائے گی۔

ہندوستھان سماچار

ہندوستان سماچار / محمد شہزاد