چنئی، 4 مئی (ہ س)۔

تمل ناڈو اسمبلی انتخابات کے لیے ابتدائی گنتی کے رجحانات نے ریاست میں ایک بڑے سیاسی تبدیلی کا انکشاف کیا ہے۔ اداکار سے سیاست داں بنے وجے کی پارٹی، تمل ناڈو ویٹری کزگم (ٹی وی کے) نے مضبوط کارکردگی کا مظاہرہ کرتے ہوئے 109 سیٹوں پر برتری حاصل کی ہے۔

234 رکنی ریاستی اسمبلی میں اکثریت کے لیے 118 نشستیں درکار ہوتی ہیں۔ ایسا لگتا ہے کہ ٹی وی کے اکثریت کے نشان کے قریب پہنچ رہا ہے، سیاسی سرگرمی کو ہوا دے رہی ہے۔

دوسری طرف، آل انڈیا انا دراوڑ منیترا کزگم (اے آئی اے ڈی ایم کے) 62 سیٹوں پر اور دراوڑ منیترا کزگم (ڈی ایم کے) 41 سیٹوں پر آگے ہے۔ ان ابتدائی رجحانات کے درمیان، ریاست میں معلق اسمبلی کا امکان بڑھتا دکھائی دے رہا ہے، جس سے حکومت سازی کے بارے میں غیر یقینی صورتحال پیدا ہو رہی ہے۔

ووٹوں کی گنتی کے دوران چنئی کے نیلنگرائے میں اداکار وجے کی رہائش گاہ کے ارد گرد سیکورٹی سخت کردی گئی ہے۔ متوقع ہجوم اور حامیوں کی بڑی تعداد کے پیش نظر کسی بھی افراتفری یا ناخوشگوار واقعات کو روکنے کے لیے بڑی تعداد میں پولیس اہلکاروں کو تعینات کیا گیا ہے۔

رجحانات کے مطابق، وجے خود پیرمبور اور تروچیراپلی مشرقی اسمبلی حلقوں میں آگے ہیں۔ انتخابی مہم کے دوران انہوں نے دعویٰ کیا تھا کہ ان کی پارٹی خود حکومت بنائے گی اور عوام کی توقعات پر پورا اترے گی۔ انہوں نے امن و امان اور انتظامی کوتاہیوں پر ڈی ایم کے حکومت پر بھی شدید حملے شروع کئے۔

دریں اثنا،بودینائے کنور اسمبلی حلقے میں ڈی ایم کے امیدوار مضبوط پوزیشن میں ہے۔ریاست بھر میں ڈی ایم کے اتحاد، اے آئی اے ڈی ایم کے زیرقیادت این ڈی اے، ٹی وی کے، نام تملر کچی (این ٹی کے) اور آزاد امیدواروں کے ووٹوں کی گنتی جاری ہے۔

قابل ذکر ہے کہ 2021 کے اسمبلی انتخابات میں ڈی ایم کے نے 146 سیٹوں کے ساتھ واضح اکثریت حاصل کی تھی۔ اس بار، رجحانات نقصان کی نشاندہی کرتے ہیں، جس نے ریاست میں حکومت مخالف بحث کو تیز کر دیا ہے۔

دریں اثنا، ضلع کرشناگری سے ایک افسوسناک واقعہ سامنے آیا ہے، جہاں ٹی وی کے کے حامی مہندرن (28) نے مبینہ طور پر پارٹی کی شکست کی افواہوں کی وجہ سے خودکشی کی کوشش کی۔ اسے تشویشناک حالت میں اسپتال میں داخل کرایا گیا ہے۔

فی الحال، پوری ریاست کی توجہ حتمی نتائج پر لگی ہوئی ہے۔ یہ دیکھنا دلچسپ ہوگا کہ آیا ٹی وی کے اکثریت حاصل کرے گی یا تمل ناڈو کو معلق اسمبلی کا سامنا کرنا پڑے گا۔

ہندوستھان سماچار

ہندوستان سماچار / عطاءاللہ