چنئی، 3 مئی (ہ س)۔ پیر کو تمل ناڈو اسمبلی انتخابات کی ووٹوں کی گنتی کے لیے تمام تیاریاں مکمل کر لی گئی ہیں۔ ریاست بھر میں گنتی کے 62 مراکز قائم کیے گئے ہیں۔ تمام پولنگ ا سٹیشنز پر سہ سطحی سکیورٹی کا انتظام کیا گیا ہے۔اس دوران نہ صرف تمل ناڈو بلکہ پورا ملک انتخابی نتائج کا بے صبری سے انتظار کر رہا ہے۔

تمل ناڈو کی چیف الیکٹورل آفیسر ارچنا پٹنائک نے اتوار کو ایک بیان جاری کیا جس میں کہا گیا کہ 23 اپریل کو ہونے والے تمل ناڈو اسمبلی انتخابات کے ووٹوں کی گنتی 4 مئی کو ہوگی۔ انہوں نے کہا کہ الیکٹرانک ووٹنگ مشینوں (ای وی ایم) میں ریکارڈ ووٹوں کی گنتی کے لیے تمام تیاریاں مکمل کر لی گئی ہیں۔ریاست کے 75,064 پولنگ بوتھوں کے ووٹوں اورپوسٹل بیلٹ کیلئے 62 گنتی مراکز اقائم کئے گئے ہیں۔ ڈاک بیلٹ پیپراورالیکٹرانک ذرائع سے بھیجے گئے پوسٹل بیلٹ (ای ٹی پی بی) اور ای وی ایم ووٹوں کی گنتی کے لیے کل 3,324 میزیں قائم کی گئی ہیں۔ پوسٹل بیلٹس کے لیے ہر 500 بیلٹس کے لیے ایک گنتی کی میز رکھی گئی ہے۔ اس کے لیے 1,135 اضافی اسسٹنٹ ریٹرننگ افسران کو تعینات کیا گیا ہے۔

انہوں نے کہا کہ ووٹوں کی گنتی ریٹرننگ افسران اور اسسٹنٹ ریٹرننگ افسران کے تعاون سے کی جائے گی۔ گنتی کے لیے کل 10,545 عملے کے ارکان کو مقرر کیا گیا ہے۔ مزید برآں، عمل کی شفافیت اور انصاف کو یقینی بنانے کے لیے 4,624 مائیکرو مبصرین کو تعینات کیا گیا ہے۔ انہوں نے کہا کہ الیکشن کمیشن آف انڈیا نے گنتی کے عمل کی نگرانی اور الیکشن کمیشن کی ہدایات پر سختی سے عمل درآمد کو یقینی بنانے کے لیے کل 234 گنتی مبصرین کا تقرر کیا ہے، یعنی ہر ایک اسمبلی حلقے کے لیے ایک مبصرکا تقرر کیا گیا ہے۔

پولنگ ا سٹیشنوں پر سہ سطحی سکیورٹی کا نظام ہو گا۔

100 میٹر تک پھیلے ہوئے ہر گنتی مرکز کے ارد گرد ایک حفاظتی گھیراو قائم کیا گیا ہے۔ اس علاقے میں صرف مجاز افراد کو داخلے کی اجازت ہوگی۔ شناختی کارڈ کی جانچ پڑتال اور جسمانی تلاشی لینے کے لیے داخلی دروازوں پر مناسب پولیس اہلکار تعینات کیے جائیں گے۔ دوسری سطح (سنٹرل زون) میں، گنتی کمپلیکس کے داخلی دروازوں پر ریاستی مسلح افواج کی تعیناتی کی جائے گی۔ اس علاقے میں غیر مجاز نقل و حرکت ممنوع ہوگی، اور موبائل فون اور دیگر مواصلاتی آلات کے استعمال کی اجازت صرف مخصوص جگہوں پر ہوگی۔ مزید برآں، تیسری سطح، سب سے اہم حفاظتی سطحجو گنتی کے کمروں کے داخلی راستوں پر واقع ہے اور اندرونی زون میں ای وی ایم سیکوریٹی رومز کو سنٹرل آرمڈ پولیس فورسز سنبھالے گی۔ مقامی پولیس اور ریاستی مسلح افواج کے علاوہ سینٹرل آرمڈ پولیس فورسز کی 65 کمپنیاں گنتی مراکز پر سیکورٹی کے لیے تعینات کی گئی ہیں۔

چیف الیکٹورل آفیسر ارچنا پٹنائک نے بتایا کہ صبح 8 بجے پوسٹل بیلٹ کی گنتی کے ساتھ گنتی شروع ہوگی۔ اس کے بعد صبح 8:30 بجے ای وی ایم میں درج ووٹوں کی گنتی ہوگی اور تمام اسمبلی حلقوں کے لیے راو¿نڈ وار نتائج کا اعلان متعلقہ انتخابی عہدیداروں کے ذریعہ گنتی مراکز پر نصب پبلک ایڈریس سسٹم کے ذریعہ کیا جائے گا۔

---------------

ہندوستان سماچار / عبدالسلام صدیقی