نئی دہلی، 29مئی (ہ س)۔ مغربی ایشیا میں جاری بحران کے درمیان مرکزی حکومت نے جمعہ کو کہا کہ ملک کے پاس پٹرول، ڈیزل، گھریلو ایل پی جی، قدرتی گیس اور خام تیل کا کافی ذخیرہ ہے۔ حکومت نے کہا کہ تمام ریفائنریاں بھی اپنی پوری صلاحیت سے کام کر رہی ہیں۔ اس کے ساتھ ہی ایل پی جی کی پیداوار تقریبا 92 ٹی ایم ٹی (ہزار میٹرک ٹن) یومیہ ریکارڈ سطح پر ہے۔

پٹرولیم اور قدرتی گیس کی وزارت کی جوائنٹ سکریٹری سجاتا شرما نے نئی دہلی میں ایک بین وزارتی پریس کانفرنس میں بتایا کہ ایل پی جی کی پیداوار تقریبا 92 ٹی ایم ٹی (ہزار میٹرک ٹن) یومیہ کی ریکارڈ بلند ترین سطح پر ہے۔ گھریلو کھانا پکانے کی گیس (ایل پی جی) تقسیم کاروں میں سے کسی نے بھی اسٹاک ختم ہونے کی شکایت نہیں کی ہے۔ کچھ اضلاع میں زرعی مانگ اور بازار کے بدلتے رجحانات کی وجہ سے پیٹرول اور ڈیزل کی فروخت میں غیر معمولی اضافہ دیکھا گیا ہے، لیکن سپلائی مستحکم رہی ہے۔ شرما نے کہا کہ ریاستی حکومتوں، مرکز کے زیر انتظام علاقوں اور صنعتی انجمنوں کو ذخیرہ اندوزی اور بلیک مارکیٹنگ بند کرنے کا مشورہ دیا گیا ہے اور صارفین پر زور دیا گیا ہے کہ وہ صرف مجاز چینلز کے ذریعے ایندھن خریدیں۔ انہوں نے کہا کہ حکومت نے اس بات کا اعادہ کیا ہے کہ ایندھن کی دستیابی کافی ہے اور غیر ضروری طور پر اسٹاک ذخیرہ کرنے کی ضرورت نہیں ہے۔ انہوں نے کہا کہ مارچ سے اب تک 83 لاکھ سے زیادہ پی این جی کنکشن شروع کیے جا چکے ہیں اور 8.5 لاکھ نئے صارفین رجسٹرڈ ہو چکے ہیں۔ صرف پچھلے چار دنوں میں ہی ایل پی جی ریفل کی 1.78 کروڑ بکنگ موصول ہوئی ہیں اور تقریبا 1.80 کروڑ سلنڈر ڈیلیور کیے گئے ہیں، جن میں سے 96 فیصد ڈیلیوریوں کی ڈیجیٹل تصدیق کی گئی ہے۔ شرما نے کہا کہ انفورسمنٹ ایجنسیوں اور آئل مارکیٹنگ کمپنیوں نے بھی معائنہ تیز کر دیا ہے۔ تجارتی ایل پی جی کی سپلائی مسلسل مضبوط ہے اور صنعتی اور تجارتی صارفین کو قدرتی گیس کی سپلائی 99 فیصد تک بحال کر دی گئی ہے۔ علاقے میں موجود تمام ہندوستانی ملاح محفوظ ہیں۔

مزید برآں وزارت خارجہ میں ایڈیشنل سکریٹری (خلیجی) عاصم آر مہاجن نے کہا کہ وزارت خارجہ خلیج اور مغربی ایشیا کے خطے میں ہونے والی پیش رفت پر گہری نظر رکھے ہوئے ہے۔ خطے میں ہمارے سفارت خانے اور قونصلیٹ ہندوستانی شہریوں کو بروقت مدد فراہم کرنے کے لیے چوبیس گھنٹے ہیلپ لائنز چلا رہے ہیں۔ وہ فعال طور پر ہمارے شہریوں کی مدد کر رہے ہیں اور مقامی حکومتوں کے ساتھ مسلسل رابطے میں بھی ہیں۔ ہندوستانی اور یو اے ای ایئر لائنز یو اے ای سے ہندوستان کے مختلف مقامات کے لیے پروازیں چلا رہی ہیں۔ سعودی عرب اور عمان کے مختلف ہوائی اڈے بھی ہندوستان کے مختلف مقامات کے لیے پروازیں چلا رہے ہیں۔ قطر کی فضائی حدود جزوی طور پر کھلی ہیں۔

ہندوستھان سماچار

ہندوستان سماچار / Mohammad Khan