نئی دہلی، 28 مئی (ہ س)۔ بھارتیہ جنتا پارٹی (بی جے پی) دہلی ریاست کے نئے مقرر کردہ صدر ہرش ملہوترا نے جمعرات کو چارج سنبھال لیا۔ ریاستی صدر وریندر سچدیوا نے ریاستی دفتر میں منعقدہ ایک تقریب میں انہیں چارج سونپا۔
اس موقع پر دہلی کی وزیر اعلیٰ ریکھا گپتا، ریاستی تنظیم کے جنرل سکریٹری پون رانا، سابق صدر ڈاکٹر ہرش وردھن، وجے گوئل، ستیش اپادھیائے، ممبران پارلیمنٹ منوج تیواری اور آدیش گپتا، دہلی کے وزراء پرویش صاحب سنگھ، سردار منجندر سنگھ سرسا، آشیش سود اور کپل مشرا، میئر پرویش سنگھ واہی، ایم پی رامویر سنگھ اور دیگر رہنما موجود تھے۔ دہلی بی جے پی کے صدر اور مرکزی وزیر مملکت ہرش ملہوترا نے سب کا شکریہ ادا کرتے ہوئے کہا کہ 27 سال بعد دہلی میں بی جے پی کی حکومت بنی اور ریکھا گپتا وزیر اعلیٰ بنیں۔ یہ سب دہلی میں ہماری پارٹی کے ہزاروں کارکنوں کی محنت اور ہمارے سبکدوش ہونے والے صدر وریندر سچدیوا کی متاثر کن قیادت کا نتیجہ ہے۔
وزیر اعظم نریندر مودی، وزیر داخلہ امت شاہ اور قومی صدر نتن نوین کا شکریہ ادا کرتے ہوئے ملہوترا نے کہا، بی جے پی میں ذمہ داریاں 400 میٹر کی ریلے ریس کی طرح ہیں۔ آج وریندر سچدیوا نے مجھے ذمہ داری کا یہ ڈنڈا سونپا ہے۔ انہوں نے کہا کہ دہلی میں پارٹی کے ہزاروں کارکنوں کے ساتھ اور قیادت کی رہنمائی میں وہ دہلی میں بی جے پی کو آگے بڑھانے اور دہلی حکومت کے کام کو مزید تیز کرنے کا کام کریں گے۔
دہلی بی جے پی کے سبکدوش ہونے والے صدر وریندر سچدیوا نے کہا، ہرش ملہوترا کے پاس بطور منتظم تجربہ ہے، میئر، ایم پی اور وزیر کے طور پر کام کر چکے ہیں اور ایک منتظم کے طور پر بھی وسیع تجربہ رکھتے ہیں۔ ہم گزشتہ 25 سالوں سے ایک ساتھ کام کر رہے ہیں اور تنظیم ان کے تجربے سے فائدہ اٹھائے گی۔ ان کی قیادت میں ہماری تنظیم ان بلندیوں تک پہنچتی رہے گی جس کا ہم سب نے تصور کیا ہے۔
---------------
ہندوستان سماچار / عبدالسلام صدیقی
