اناو، 26 مئی (ہ س)۔ اترپردیش میں اناو ضلع کے اوراس تھانہ علاقے کے تحت لکھنو-آگرہ ایکسپریس وے پر ایک ڈبل ڈیکر بس الٹنے سے ایک سب انسپکٹر اور ایک قیدی سمیت چھ افراد کی موت ہو گئی۔ تین کانسٹیبلوں سمیت اکیس دیگر مسافر شدید زخمی ہو گئے۔ سینئر ضلعی حکام نے جائے وقوعہ کا معائنہ کیا اور شدید زخمیوں کو ٹراما سینٹر ریفر کیا گیا۔

اطلاعات کے مطابق، اوراس پولیس اسٹیشن کے تحت لکھنو-آگرہ ایکسپریس وے پر دہلی سے بہار جانے والی بس کے ڈرائیور کو اچانک نیند آگئی، جس سے ڈبل ڈیکر بس بے قابو ہو گئی اور ڈیوائیڈر توڑ کر الٹ گئی۔ صبح 4 بجے کے قریب پیش آنے والے اس حادثے سے مسافروں میں کہرام مچ گیا۔ اطلاع ملتے ہی یوپی ڈی اے اور پولیس جائے وقوعہ پر پہنچی اور ریسکیو آپریشن شروع کیا۔ ضلع مجسٹریٹ گھنشیام مینا اور پولیس سپرنٹنڈنٹ جے پرکاش سنگھ بھی پہنچے۔ تمام زخمیوں کو کمیونٹی ہیلتھ سینٹر لے جایا گیا تاہم ڈاکٹروں نے چھ افراد کو مردہ قرار دے دیا۔ ڈاکٹروں نے 21 شدید زخمیوں کو لکھنو کے کے جی ایم یو ریفر کر دیا۔ پولیس نے بس کو سڑک سے ہٹا کر ٹریفک بحال کر دی۔

حادثے میں ہلاک ہونے والوں میں بہار کے سیوان ضلع پولیس لائنز میں تعینات سب انسپکٹر رام چندر رام اور گروگرام کے رہنے والے قیدی چھترپال سنگھ تومر شامل ہیں۔ دیگر مرنے والوں میں وجے گپتا، روی ورون، سورج جمالال اور پلو کمار شامل ہیں۔ پولیس نے چھ لاشوں کو پوسٹ مارٹم کے لیے بھیج دیا ہے۔ زخمیوں میں بہار کے سیوان ضلع پولیس لائنز میں تعینات تین کانسٹیبل بھی شامل ہیں۔ یہ پولیس اہلکار گروگرام کی ایک عدالت میں قیدی چھترپال سنگھ تومر کی گواہی کے بعد سیوان لوٹ رہے تھے۔ مبینہ طور پر ڈبل ڈیکر بس میں 30 سے زیادہ مسافر سوار تھے، جن میں سے زیادہ تر کا تعلق بہار سے تھا۔ اوراس کمیونٹی ہیلتھ سینٹر کے انچارج انوپ تیواری نے بتایا کہ اس حادثے میں چھ لوگوں کی موت ہوگئی اور 21 شدید زخمی ہوئے، جنہیں لکھنو کے ٹراما سینٹر ریفر کیا گیا۔ واقعے کے بارے میں سی او سونم سنگھ نے بتایا کہ صبح 5 بجے ایک نجی بس الٹ گئی، ریسکیو آپریشن جاری ہے اور زخمیوں کو علاج کے لیے داخل کرایا گیا ہے۔ ڈاکٹروں نے 21 زخمیوں کو لکھنو ریفر کر دیا ہے۔

بہار کے سیوان میں ہمارے نامہ نگار کے مطابق اس واقعے کے بارے میں سیوان کے پولیس سپرنٹنڈنٹ پورن کمار جھا نے بتایا کہ پولیس اہلکار ایک قیدی کو ڈویژنل جیل سے گروگرام عدالت میں سماعت کیلئے لے گئے تھے ۔ واپسی پر اناو میں بس حادثے میں انسپکٹر اور قیدی کی موت ہو گئی۔ دیگر زخمی پولیس اہلکاروں کے علاج کے لیے انتظامات کیے جا رہے ہیں۔

---------------

ہندوستان سماچار / عبدالسلام صدیقی