پٹنہ، 26 مئی (ہ س)۔ بہار پولیس ہیڈکوارٹر کی اسپیشل ٹاسک فورس (ایس ٹی ایف) نے جرائم پر قابو پانے کی مہم میں ایک اور بڑی کامیابی حاصل کی ہے۔ ایس ٹی ایف کی ایک خصوصی ٹیم نے مظفر پور ضلع کے بدنام اور انتہائی مطلوب مجرم سونو کمار کو گوپال گنج سے گرفتار کیا ہے۔

یہ ہائی پروفائل گرفتاری گوپال گنج ضلع کے صدر تھانہ علاقے میں ایک منصوبہ بند چھاپہ ماری کے دوران ہوئی ہے۔ پولیس اور ایس ٹی ایف کی ٹیمیں طویل عرصے سے اس بدنام زمانہ جرائم پیشہ کی تلاش میں تھیں، لیکن وہ مسلسل پولیس سے بھاگتا رہا۔

ایس ٹی ایف کے اسپیشل انٹیلی جنس یونٹ کو حال ہی میں ایک ٹھوس ان پٹ ملا تھا کہ مظفر پور کے صاحب گنج تھانہ علاقے کا ایک مطلوب جرام پیشہ گوپال گنج ضلع میں چھپا ہوا ہے۔ اطلاع کی سنگینی کو دیکھتے ہوئے ایس ٹی ایف نے فوری طور پر خصوصی آپریشن کا منصوبہ بنایا۔

منصوبے کے تحت ایس ٹی ایف کے اہلکاروں نے گوپال گنج کے صدر تھانہ علاقے میں مشتبہ ٹھکانوں کو گھیرے میں لے کر جال بچھا دیا۔ اس کے بعد بدمعاش سونو کمار کو انتہائی چوکس اور منصوبہ بند چھاپے کے ذریعے گرفتار کیا گیا۔ اس نے اپنی گرفتاری کے دوران فرار ہونے کی کوشش کی لیکن اہلکاروں نے اسے گھیر لیا اور پکڑ لیا۔

گرفتار ملزم سونو کمارولد دھرمیندر پانڈے مظفر پور ضلع کے صاحب گنج تھانہ علاقہ کے نواں نگر نظامت گاؤں کا رہنے والا ہے۔

پولیس ریکارڈ کے مطابق سونو کمار کی مجرمانہ تاریخ طویل ہے۔ وہ مظفر پور کے صاحب گنج تھانہ میں مقدمہ نمبر 51621 (مورخہ 18.11.2021) کا کلیدی ملزم تھا۔ ان کے خلاف آئی پی سی کی دفعہ 394 (لوٹ کے دوران چوٹ پہنچانا)، 307 (قتل کی کوشش) اور 34 کے تحت سنگین مقدمات درج ہیں۔

جب سے یہ مقدمہ 2021 میں درج ہوا تھا، وہ پولیس سے بھاگ رہا تھا اور مسلسل اپنی جگہیں بدل رہا تھا۔ اس دوران وہ مختلف اضلاع اور ریاستوں میں روپوش تھا۔

سرکاری ریکارڈ کے مطابق اس کے خلاف مظفر پور ضلع کے صاحب گنج تھانہ میں قتل کی کوشش اورلوٹ سمیت سنگین مقدمات درج ہیں، جس کے لیے وہ کافی عرصے سے مطلوب تھا۔

گرفتاری کے بعد تلاشی کے دوران اس سے ایک موبائل فون اور ایک موٹرسائیکل برآمد ہوئی۔ پولیس کو شبہ ہے کہ موبائل فون کی کال ڈیٹیل اور ڈیٹا کی جانچ پڑتال سے اس کا پورا نیٹ ورک سامنے آسکتا ہے، جبکہ موٹرسائیکل اس نے اپنے جرائم اور فرار کے دوران استعمال کی تھی۔

اس گرفتاری کے بعد بہار پولیس ہیڈ کوارٹر نے راحت کی سانس لی ہے۔ مظفر پور اور گوپال گنج پولیس کی مشترکہ ٹیم فی الحال ملزم سے پوچھ گچھ کر رہی ہے۔ ضروری کاغذی کارروائی مکمل کرنے کے بعد اسپیشل ٹاسک فورس (ایس ٹی ایف) نے اسے مزید قانونی کارروائی کے لیے مقامی تھانہ کے حوالے کردیا۔

پولیس کا کہنا ہے کہ ملزم کو عدالت میں پیش کیا جائے گا۔ مظفر پور پولیس پرانے مقدمات کی مزید تفتیش کے لیے اسے ریمانڈ پر لے جانے کی بھی تیاری کر رہی ہے۔

ہندوستھان سماچار

ہندوستان سماچار / Mohammad Afzal Hassan