ممبئی ، 25 مئی (ہ س) مہاراشٹر کے ضلع رائےگڑھ میں مہابلیشور-پولاڈپور روڈ پر واقع امبینالی گھاٹ علاقے میں گزشتہ رات ایک کار تقریباً 900 فٹ گہری کھائی میں گر گئی، جس کے نتیجے میں کار میں سوار آٹھ افراد کی موقع پر ہی موت ہو گئی۔ پیر کی صبح سے جاری راحت اور بچاؤ کارروائی کے دوران اب تک پانچ لاشیں کھائی سے نکال لی گئی ہیں، جبکہ باقی متاثرین کو نکالنے کا کام جاری ہے۔

حادثے کی جانچ کر رہے ہائی وے پولیس کے ایک افسر کے مطابق ستارا ضلع کے رہنے والے آٹھ افراد ہفتہ کے روز پکنک منانے کے لیے رتناگری ضلع کے داپولی گئے تھے۔ یہ تمام افراد اتوار کی دیر رات داپولی سے ستارا واپس لوٹ رہے تھے۔ اسی دوران جب ان کی کار امبینالی گھاٹ علاقے میں پہنچی تو اچانک ڈرائیور کا گاڑی پر سے کنٹرول ختم ہو گیا اور کار تقریباً 800 سے 900 فٹ گہری کھائی میں جا گری۔

پولیس کے مطابق جب کار میں سوار نوجوان رات بھر گھر واپس نہیں پہنچے تو اہل خانہ نے ہائی وے پولیس سے رابطہ کیا۔ موبائل فون ٹریکنگ کے ذریعے پتہ چلا کہ ان کی گاڑی گھاٹ کی کھائی میں گری ہوئی ہے۔ اس اطلاع کے بعد اتوار کی صبح سویرے بڑے پیمانے پر ریسکیو آپریشن شروع کیا گیا۔

امدادی کارروائی میں مہابلیشور ٹریکرس اور پرتاپ گڑھ سرچ اینڈ ریسکیو ٹیموں کو بھی شامل کیا گیا۔ دشوار گزار علاقے اور گہری کھائی کے باعث بچاؤ کارروائی انتہائی مشکل ثابت ہوئی۔

حادثے میں ہلاک ہونے والوں کی شناخت مہیش انیل پوار (25)، آدتیہ اشوک سالونکھے (21)، رتیش راجندر لوکھنڈے (25)، سہاس جتیندر لوکھنڈے (20)، ایش سمیر چوہان (18)، اتکرش آنند شنگٹے (21)، انیل ابھمنیو شنگٹے (25) اور نتن کسان نائیکونڈے (35) کے طور پر کی گئی ہے۔

پولیس اور ریسکیو ٹیمیں جائے حادثہ پر مسلسل کارروائی میں مصروف ہیں اور پورے معاملے کی مزید جانچ جاری ہے۔

ہندوستھان سماچار

--------------------

ہندوستان سماچار / جاوید این اے