گاندھی نگر، 25 مئی (ہ س)۔ گجرات حکومت نے ڈیجیٹل گورننس کو نئی سمت دیتے ہوئے شہریوں کو واٹس ایپ کے ذریعے سرکاری خدمات فراہم کرنے کی جانب ایک اہم قدم اٹھایا ہے۔ وزیر اعظم نریندر مودی کے ’ناگرک دیوو بھو:‘ کے تصور کو آگے بڑھاتے ہوئے ریاستی حکومت اور میٹا پلیٹ فارمز اِنک کے درمیان گاندھی نگر میں واٹس ایپ پر مبنی سٹیزن سروس ڈلیوری کے حوالے سے ایک اہم مفاہمت نامہ (ایم او یو) پر دستخط کیے گئے۔

وزیر اعلیٰ بھوپیندر پٹیل کی موجودگی میں ہونے والے اس معاہدے کو گجرات میں ون ڈے گورننس سے واٹس ایپ گورننس کی طرف بڑھتا ہوا ایک بڑا قدم مانا جا رہا ہے۔ ریاستی حکومت پہلے ہی ’سگم ڈیجیٹل گجرات‘ پہل کے تحت پانچ اہم محکموں کی تقریباً 20 شہری مرکوز خدمات واٹس ایپ چیٹ بوٹ کے ذریعے فراہم کر رہی ہے۔ اب اس نئی شراکت داری کے ذریعے ان خدمات کو مزید آسان، تیز اور مؤثر بنایا جائے گا۔

اس پہل کے نافذ ہونے کے بعد ریاست کے شہری انگریزی اور گجراتی زبان میں ایک ہی واٹس ایپ نمبر کے ذریعے مختلف سرکاری خدمات کا فائدہ اپنے موبائل فون پر گھر بیٹھے حاصل کر سکیں گے۔ اس سے لوگوں کو الگ الگ سرکاری پورٹلز پر جانے یا سرکاری دفاتر میں لمبی قطاروں میں کھڑے رہنے کی ضرورت نہیں پڑے گی۔

ریاستی حکومت کی جانب سے واٹس ایپ پلیٹ فارم پر فراہم کی جانے والی خدمات میں شکایت کے ازالے کی سہولت، آمدنی کا سرٹیفکیٹ، ذات کا سرٹیفکیٹ، ای ڈبلیو ایس سرٹیفکیٹ، راشن کارڈ اپ ڈیٹ، ریونیو ریکارڈ اور سرکاری حلف نامے جیسی کئی اہم سہولیات شامل ہوں گی۔ اس کے ساتھ ہی شہریوں کو درخواست کے عمل سے لے کر سرٹیفکیٹ حاصل ہونے تک کی مکمل معلومات اور ریئل ٹائم اسٹیٹس ٹریکنگ کی سہولت بھی ملے گی۔

ریاستی حکومت کا ماننا ہے کہ اس نئی نظام سے سرکاری خدمات کی رسائی دیہی اور شہری دونوں علاقوں میں مزید مضبوط ہوگی۔ موبائل پر چند کلکس میں خدمات دستیاب ہونے سے شہریوں کا وقت اور خرچ دونوں بچیں گے، جبکہ شفافیت اور جوابدہی بھی مضبوط ہوگی۔ حکومت آنے والے وقت میں مرحلہ وار مزید خدمات کو اس واٹس ایپ پر مبنی پلیٹ فارم سے جوڑنے کی تیاری کر رہی ہے۔

گجرات حکومت پہلے ہی شہری علاقوں میں جن سیوا کیندروں اور دیہی علاقوں میں وی سی ای پر مبنی نظام کے ذریعے لاکھوں لوگوں تک سرکاری خدمات پہنچا رہی ہے۔ اب میٹا کے ساتھ ہونے والے اس معاہدے کے ذریعے گجرات ڈیجیٹل اور شہری مرکوز گورننس کے اگلے مرحلے میں داخل ہو رہا ہے۔

اس موقع پر ریاستی حکومت کے جنرل ایڈمنسٹریشن محکمہ کے ٹریننگ اینڈ ایڈمنسٹریٹو ریفارمز ڈپارٹمنٹ کے سیکریٹری ہاریت شکلا اور میٹا کے ڈائریکٹر و ہیڈ آف پالیسیز امن جین اور کنٹری ڈائریکٹر اے سری نواس نے ایم او یو پر دستخط کیے۔ پروگرام میں چیف سیکریٹری ایم کے داس، ڈاکٹر ہسمکھ اڈھیا، انجو شرما، سنجیو کمار، ڈاکٹر وکرانت پانڈے اور ڈاکٹر اجے کمار سمیت کئی سینئر افسران موجود تھے۔

ہندوستھان سماچار

---------------

ہندوستان سماچار / عبدالواحد