نئی دہلی، یکم مئی (ہ س)۔ 12 رکنی ہندوستانی شاٹگن ٹیم قازقستان کے الماتی میں منعقد ہونے والے سال کے دوسرے انٹرنیشنل شوٹنگ اسپورٹ فیڈریشن (آئی ایس ایس ایف) ورلڈ کپ شاٹگن مرحلے میں شرکت کے لیے پوری طرح تیار ہے۔ ٹیم کی آمد ہفتہ (02 مئی) سے شروع ہوگی۔ 10 روزہ مقابلے میں 42 قومی اولمپک کمیٹیوں کی نمائندگی کرنے والے کل 284 کھلاڑی پانچ اولمپک مقابلوں میں حصہ لیں گے۔ ہندوستانی ٹیم کے آٹھ ارکان بھی صرف رینکنگ پوائنٹس (آر پی او) شوٹر کے طور پر مقابلہ کریں گے۔

مقابلوں کا آغاز 4 مئی کو مردوں اور خواتین کی سکیٹ کوالیفکیشن سے ہو گا جبکہ فائنل اگلے روز کھیلا جائے گا۔ دونوں ٹریپ فائنل 9 مئی کو شیڈول ہیں، جبکہ پانچواں اور آخری فائنل، ٹریپ مکسڈ ٹیم ایونٹ، ہفتہ (10 مئی 2026) کو کھیلا جائے گا۔ ہندوستانی شاٹ گن ٹیم نے مارچ میں مراکش کے تانگیر میں منعقد ہونے والے پہلے ورلڈ کپ مرحلے سے اپنی بین الاقوامی مہم کا آغاز کیا۔

مقابلے کے پہلے دن تین ہندوستانی اولمپین ایکشن میں نظر آئیں گے: سینئر نشانے باز معراج احمد خان، اننت جیت سنگھ نروکا (مردوں کا سکیٹ) اور رائزا ڈھلون (خواتین کا سکیٹ)۔ تینوں اس سال پہلی بار بین الاقوامی سطح پر مقابلہ کریں گے۔ ایک مضبوط اطالوی ٹیم کے علاوہ، ہندوستانی نشانے بازوں کو فن لینڈ، ڈنمارک، چیک ریپبلک، قبرص، یونان، پیرو اور قطر جیسے مضبوط شاٹ گن ممالک کے ٹاپ شوٹرز سے سخت مقابلے کا سامنا کرنا پڑے گا۔

میزبان قازقستان کے پاس بھی ایک مضبوط ٹیم ہے، جبکہ چین اور روس کی موجودگی (بطور انفرادی غیر جانبدار ایتھلیٹس - اے آئی این) مقابلے کو مزید سخت بنا دے گی۔ پوڈیم تک پہنچنے کے لیے ہندوستانی شوٹرز کو اپنی بہترین کارکردگی کا مظاہرہ کرنا ہوگا۔

---------------

ہندوستان سماچار / عبدالسلام صدیقی