مدھیہ پردیش میں موسم کا مزاج پھر بدلے گا، تین دن آندھی-بارش کا الرٹ، کئی اضلاع میں تیز ہوائیں چلیں گی

۔ آج بھوپال اور گوالیار سمیت 34 اضلاع میں آندھی-بارش کا امکان

بھوپال، 07 اپریل (ہ س)۔ مدھیہ پردیش میں موسم نے ایک بار پھر کروٹ لے لی ہے۔ ریاست میں نیا ویدر سسٹم سرگرم ہونے کی وجہ سے اگلے تین دنوں تک خاص طور پر شمالی اور مشرقی علاقوں میں آندھی اور بارش کا دور جاری رہے گا۔ محکمہ موسمیات نے 9 اپریل تک تیز ہواوں، بارش اور گرج چمک کے حوالے سے الرٹ جاری کیا ہے۔

محکمہ موسمیات نے بتایا کہ آج منگل کو بھوپال اور گوالیار سمیت کل 34 اضلاع میں آندھی اور بارش کا امکان ہے۔ ان اضلاع میں گوالیار، بھنڈ، مرینا، دتیا، شیوپور، شیوپوری، گنا، اشوک نگر، ودیشا، بھوپال، راج گڑھ، شاجاپور، آگر-مالوہ، اجین، رتلام، نیمچ، مندسور، نیواڑی، ٹیکم گڑھ، ساگر، دموہ، چھترپور، پنا، ستنا، ریوا، مئوگنج، سیدھی، سنگرولی، میہر، کٹنی، امریا، شہڈول، ڈنڈوری اور انوپ پور شامل ہیں۔

وہیں، 8 اور 9 اپریل کو بھی گوالیار، چنبل، ساگر اور ریوا ڈویژن کے اضلاع میں اس سسٹم کا اثر جاری رہے گا۔ دوپہر کے بعد موسم میں تبدیلی دیکھنے کو ملے گی اور کئی مقامات پر تیز ہواوں کے ساتھ بارش ہو سکتی ہے۔ ہوا کی رفتار کے حوالے سے بھی وارننگ دی گئی ہے۔ کچھ علاقوں میں آندھی کی رفتار 50 سے 60 کلومیٹر فی گھنٹہ تک پہنچ سکتی ہے، جبکہ دیگر علاقوں میں یہ 30 سے 40 کلومیٹر فی گھنٹہ کے درمیان رہنے کا اندازہ ہے۔

محکمہ موسمیات نے مزید بتایا کہ 11 اپریل کو شمال مغربی علاقے میں ایک نیا مغربی ڈسٹربنس سرگرم ہو سکتا ہے، جس کا اثر مدھیہ پردیش کے موسم پر بھی پڑنے کا امکان ہے۔ اس سے پہلے 04 سے 06 اپریل کے درمیان ریاست میں شدید موسمی سرگرمیاں دیکھی جا چکی ہیں۔ 4 اپریل کو 14 اضلاع میں ژالہ باری اور 39 اضلاع میں تیز آندھی-بارش ہوئی تھی۔ اس کے بعد اتوار اور پیر کو بھی کئی علاقوں میں موسم بدلا رہا اور کہیں کہیں بارش درج کی گئی۔

عام طور پر اپریل اور مئی کو سال کے سب سے گرم مہینوں میں شمار کیا جاتا ہے، لیکن اس بار مارچ کے آخری دنوں میں مغربی ڈسٹربنس اور گردابی سرکولیشن کی وجہ سے درجہ حرارت میں گراوٹ دیکھنے کو ملی۔ اپریل کے پہلے پکھواڑے میں بھی موسم اسی طرح ملا جلا رہنے کے آثار ہیں۔

ہندوستھان سماچار

---------------

ہندوستان سماچار / انظر حسن