تہران/واشنگٹن، 7 اپریل (ہ س)۔ امریکی صدر ڈونلڈ ٹرمپ کی جانب سے آبنائے ہرمز کو منگل تک نہ کھولنے کی صورت میں حملے کی دھمکی کے بعد ایران کے نائب وزیر برائے نوجوانان اور کھیل علی رضا رحیمی نے ملک کے نوجوانوں سے پاور پلانٹس کے گرد انسانی زنجیریں بنانے کی اپیل کی ہے۔ قابل ذکر ہے کہ ٹرمپ نے کہا ہے کہ ایران کو ایک ہی رات (منگل کی رات) میں مکمل طور پر تباہ کیا جا سکتا ہے۔

سی این این کے مطابق ،علی رضا رحیمی نے یہ اپیل ٹرمپ کی دھمکی کے بعد کی۔ ٹرمپ نے کہا ہے کہ اگر ایران نے آبنائے ہرمز کو دوبارہ نہ کھولا تو امریکہ ،ایران کے عوامی بنیادی ڈھانچے پر بمباری کرے گا۔ رحیمی نے ایکس پر لکھا، ”میں تمام نوجوانوں، ثقافتی اور فنی شخصیات، کھلاڑیوں اور چیمپئنز کو ’ایرانی نوجوانوں کی انسانی زنجیر -ایک روشن مستقبل کے لیے‘ قومی مہم میں شامل ہونے کے لئے مدعو کرتا ہوں۔“

انہوں نے لکھا، ”منگل کو دوپہر 2 بجے، ہم سب ملک بھر کے پاور پلانٹس پر، اپنے اپنے عقائد اور نظریات کے ساتھ ایک دوسرے کا ہاتھ پکڑ کر کھڑے ہوں گے اور یہ پیغام دیں گے کہ عوامی بنیادی ڈھانچے پر حملہ کرنا ’جنگی جرم‘ ہے۔“ قابل غور ہے کہ ہفتے کے آخر میں، ٹرمپ نے کہا تھا کہ ایران کے پاس کسی سمجھوتے تک پہنچنے کے لئے منگل کی رات 8 بجے(مشرقی وقت کے مطابق) تک کا وقت ہے۔

اس دوران، امریکی صدر ڈونلڈ ٹرمپ نے کہا کہ ایران راتوں رات تباہ کیا جا سکتا ہے۔ انہوں نے کہا کہ شاید ایسا منگل کے روز ہوسکتا ہے۔ انہوں نے کہا کہ یہ ایک نازک لمحہ ہے اور یہ سب ایران کے اقدامات پر منحصر ہے۔ ٹرمپ نے ایرانی پلوں اور بجلی پلانٹس پر حملہ کرنے کی اپنی دھمکی کو دہراتے ہوئے دعویٰ کیا کہ اگر اس سے ایرانی عوام کی آزادی یقینی بنائی جا سکتی ہے تو وہ مشکلات برداشت کرنے کے لئے بھی تیار ہوں گے۔ دریں اثنا، تہران نے خبردار کیا ہے کہ اس طرح کے حملوں کے نتائج خطے سے باہر تک پہنچیں گے۔

اس سے قبل پیر کو ٹرمپ نے متعدد ممالک کی جانب سے 45 روزہ جنگ بندی کی تجویز کو ایک اہم قدم قرار دیا تھا لیکن کہا تھا کہ یہ ناکافی ہے۔ ایران کے سرکاری میڈیا کے مطابق، ایران نے اس تجویز کو مسترد کرتے ہوئے جنگ کے مستقل خاتمے کا مطالبہ کیا۔ ایران کے سپریم لیڈر مجتبیٰ خامنہ -ای نے ایک بیان میں کہا ہے کہ ایرانی فورسز کمانڈروں کے مارے جانے کے باوجود پیچھے نہیں ہٹیں گی۔

ہندوستھان سماچار

ہندوستان سماچار / محمد شہزاد