نئی دہلی، 30 اپریل (ہ س)۔ وزیر دفاع راج ناتھ سنگھ نے اپنے اطالوی ہم منصب گائیڈو کروسیٹو کے ساتھ نئی دہلی کے مانیک شا سینٹر میں دو طرفہ بات چیت کی۔ میٹنگ کے دوران، انہوں نے اس بات کا اعادہ کیا کہ ہندوستان اور اٹلی کے درمیان اسٹریٹجک شراکت داری امن، استحکام، آزادی اور باہمی احترام کی مشترکہ اقدار پر قائم ہے۔ دو طرفہ مذاکرات کے لیے ان کی آمد پر اطالوی وزیر دفاع کو گارڈ آف آنر دیا گیا۔ اطالوی وزیر دفاع گیڈو کروسیٹو نے نیشنل وار میمورئیل پر پھولوں کی چادر چڑھا کر ملک کے لئے عظیم قربانی دینے والے بہادر فوجیوں کو خراج عقیدت پیش کیا۔
دو طرفہ بات چیت کے دوران، دونوں فریقوں نے 27۔2026 کے لیے دو طرفہ فوجی تعاون کے منصوبے کا بھی تبادلہ کیا، جس میں فوجی تعاون کے لیے روڈ میپ کا خاکہ پیش کیا گیا ہے۔ راجناتھ سنگھ نے کہا، آج اپنے اطالوی ہم منصب کا دہلی میں خیرمقدم کرتے ہوئے اور ان کے ساتھ وسیع بات چیت کرتے ہوئے خوشی ہوئی۔ ہم نے مغربی ایشیا کی موجودہ صورتحال سمیت مختلف علاقائی اور عالمی مسائل پر تبادلہ خیال کیا۔ ہم نے 'آتمنیر بھر بھارت' (خود سے تعاون) ہندوستان کے دفاعی اقدام کے تحت باہمی طور پر فائدہ مند دفاعی صنعتی تعاون کو بڑھانے کے طریقوں پر بھی غور کیا۔
ملاقات کے دوران دونوں وزراء نے دونوں ممالک کے درمیان دفاعی تعاون سے متعلق مختلف امور پر تبادلہ خیال کیا۔ اسکے علاوہ انہوں نے سلامتی کے بدلتے ہوئے منظر نامے کی روشنی میں علاقائی اور عالمی مسائل پر تبادلہ خیال کیا۔ دونوں وزراء نے اس بات کا اعادہ کیا کہ ہندوستان اور اٹلی کے درمیان اسٹریٹجک شراکت داری امن، استحکام، آزادی اور باہمی احترام کی مشترکہ اقدار پر مبنی ہے۔ اکتوبر 2023 میں وزیر دفاع کے روم کے دورے کے بعد ہندوستان اور اٹلی کے درمیان دفاعی تعاون کو مزید تقویت ملی۔ وزیر دفاع کروسیٹو کا ہندوستان کا پہلا دورہ دونوں ممالک کی اپنے موجودہ تعاون کو مزید وسعت دینے اور تعاون کی نئی راہیں تلاش کرنے کی خواہش کی عکاسی کرتا ہے، خاص طور پر صنعتی شراکت داری کے دائرے میں۔ میٹنگ کے دوران، گروگرام میں واقع انفارمیشن فیوژن سینٹر – انڈین اوشین ریجن (آئی ایف سی-آئی او آر) کے ذریعے معلومات کے تبادلے سمیت مختلف اہم بحری مسائل کے حوالے سے دو دیرینہ بحری ممالک کے درمیان ہم آہنگی پر بھی زور دیا گیا۔ اس سال جنوری میں دونوں فریقوں کے درمیان طے پانے والے دفاعی اور اسٹریٹجک شراکت داری کے معاہدے کے بعد ہندوستان اور یورپی یونین کے درمیان اسٹریٹجک صف بندی مزید مستحکم ہو رہی ہے۔ یہ معاہدہ نہ صرف دفاعی صنعت میں تعاون کو تیز کرے گا بلکہ باہمی دلچسپی کے شعبوں میں نئے مواقع کو بھی فروغ دے گا۔
ہندوستھان سماچار
---------------
ہندوستان سماچار / عبدالواحد
