نئی دہلی، 30 اپریل (ہ س)۔ دہلی کی پٹیالہ ہاوس کورٹ نے منی لانڈرنگ کیس میں گرفتار آئی۔ پیک ڈائریکٹر ونیش چندیل کو باقاعدہ ضمانت دے دی۔ ایڈیشنل سیشن جج امت بنسل نے انفورسمنٹ ڈائریکٹوریٹ (ای ڈی) کی جانب سے ان کی ضمانت کی درخواست کی مخالفت نہ کرنے کے بعد انہیں ضمانت پر رہا کرنے کا حکم دیا۔

سماعت کے دوران ونیش چندیل کی نمائندگی کرنے والے وکیل نے دلیل دی کہ ای ڈی کو ضمانت کی درخواست کی مخالفت کرنے کا کافی موقع دیا گیا تھا، لیکن انہوں اس کا استعمال نہیں کیا۔ لہذا، منی لانڈرنگ کی روک تھام کے ایکٹ کے سیکشن 45 کے تحت دونوں شرائط لاگو نہیں ہوں گی۔ اس کے بعد عدالت نے ونیش چندیل کو ضمانت پر رہا کرنے کا حکم دیا۔

چندیل کو گرفتار کرنے کے بعد ای ڈی نے انہیں 13 اپریل کو دیر گئے عدالت میں پیش کیا۔ ای ڈی کے مطابق، ونیش چندیل کی پی اے سی کنسلٹنگ پرائیویٹ لمیٹڈ میں 33 فیصد حصہ داری ہے۔ اس کمپنی کے خلاف منی لانڈرنگ ایکٹ کے تحت تفتیش کی جا رہی ہے۔ دہلی پولیس نے ابتدائی طور پر اس معاملے میں ایف آئی آر درج کی تھی۔

یہ معاملہ اس وقت شروع ہوا جب انفورسمنٹ ڈائریکٹوریٹ (ای ڈی) نے آئی پی اے سی کے ڈائریکٹر پرتیک جین کی کولکاتا کی رہائش گاہ پر چھاپہ مارا، جو ترنمول کانگریس کے لئے انتخابی مہم کا کام کرتے تھے۔ ای ڈی نے یہ چھاپہ کوئلہ اسکام کی تحقیقات کے تحت مارا تھا۔ ای ڈی کا الزام ہے کہ مغربی بنگال کی وزیر اعلیٰ ممتا بنرجی اس کی تحقیقات میں رکاوٹ ڈالنے کی کوشش میں چھاپے کے دوران آئی پی اے سی کے دفتر میں داخل ہوئیں اور دستاویزات اور ڈیجیٹل ثبوت لے گئیں۔ بنرجی نے بعد میں ان الزامات کی تردید کی۔

---------------

ہندوستان سماچار / عبدالسلام صدیقی