نئی دہلی، 24 اپریل (ہ س)۔

نیشنل ہیومن رائٹس کمیشن (این ایچ آر سی) نے چھتیس گڑھ کے شکتی ضلع میں تھرمل پاور پلانٹ میں بوائلر ٹیوب دھماکے کے واقعے کا از خود نوٹس لیا ہے۔ جمعہ کو کمیشن نے ریاست کے چیف سکریٹری اور ڈائریکٹر جنرل آف پولیس (ڈی جی پی) کو نوٹس جاری کرتے ہوئے انہیں دو ہفتوں کے اندر تفصیلی رپورٹ پیش کرنے کی ہدایت کی ہے۔

قابل ذکر ہے کہ 14 اپریل کو بوائلر ٹیوب پھٹنے سے تقریباً 13 مزدور جاں بحق اور 20 زخمی ہو گئے تھے۔ مزدور دھماکے سے اٹھنے والی انتہائی گرم بھاپ کی لپیٹ میں آ گئے۔ بعد ازاں بوائلر کو بند اور ٹھنڈا کرنے کے بعد پولیس نے ریسکیو آپریشن شروع کیا۔ زخمی کارکنوں کو مختلف اسپتالوں میں داخل کرایا گیا۔

کمیشن نے رپورٹ میں کارکنوں کو معاوضے کی تقسیم اور زخمیوں کی صحت کی حالت بھی شامل کرنے کو کہا ہے۔

ہندوستھان سماچار

ہندوستان سماچار / عطاءاللہ