نئی دہلی، 22 اپریل (ہ س) ۔

جنوب مشرقی دہلی کے پوش علاقے امر کالونی میں ایک ہولناک واقعہ سامنے آیا ہے۔یہاں ایک سینئر آئی آر ایس افسر کی 21 سالہ بیٹی کو اس کے گھر کے اندر قتل کر دیا گیا۔ اطلاعات کے مطابق مقتول 1997 بیچ کے آئی آر ایس افسر کی بیٹی تھی۔ اس نے حال ہی میں اپنی انجینئرنگ کی تعلیم مکمل کی تھی اور فی الحال یونین پبلک سروس کمیشن کی تیاری کر رہی تھی۔ اہل خانہ کے مطابق وہ گھر میں پڑھتی تھی۔ گھر کے اندر پیش آنے والے اس واقعے نے سب کو چونکا دیا ہے۔

پولیس کی ابتدائی تفتیش میں یہ بات سامنے آئی ہے کہ واردات انتہائی سفاکانہ انداز میں کی گئی ۔ شبہ ہے کہ خاتون کو پہلے ریپ کیا گیا اور پھر موبائل چارجر سے گلا دبا کر قتل کیا گیا۔ تاہم پولیس نے واضح کیا ہے کہ پوسٹ مارٹم رپورٹ کے بعد ہی ریپ کی تصدیق ہوگی۔

کیس میں شک گھر کے ایک پرانے نوکر پر ہے۔ بتایا جا رہا ہے کہ راجستھان کا رہنے والا نوکر تقریباً دو ماہ قبل تک گھر میں کام کرتا تھا لیکن اس کے رویے کی وجہ سے اسے نوکری سے نکال دیا گیا۔ اسے آخری بار بدھ کی صبح گھر کے آس پاس دیکھا گیا تھا اور تب سے وہ مفرور ہے۔

واقعہ کی اطلاع ملتے ہی جنوب مشرقی ضلع کے سینئر پولیس افسران اور فرانزک ٹیم جائے وقوعہ پر پہنچی۔ پولیس نے لاش کو تحویل میں لے کر پوسٹ مارٹم کے لیے بھیج دیا ہے۔ ملزم کی تلاش کے لیے متعدد ٹیمیں تشکیل دے دی گئی ہیں اور اس کے ممکنہ ٹھکانوں پر چھاپے مارے جا رہے ہیں۔

پولیس حکام کا کہنا ہے کہ ملزمین کو جلد گرفتار کر کے سارا معاملہ حل کر لیا جائے گا۔ ادھر اس واقعہ کے بعد علاقے کے لوگوں میں خوف و ہراس کا ماحول ہے۔

ہندوستھان سماچار

ہندوستان سماچار / عطاءاللہ