کٹھوعہ پولیس نے دو مبینہ منشیات فروشوں کو گرفتار کیا
جموں، 21 اپریل (ہ س)۔ جموں و کشمیر پولیس نے منشیات کے خلاف جاری مہم کے تحت ضلع کٹھوعہ کے علاقے رام کوٹ میں کارروائی کرتے ہوئے تقریباً 9.7 گرام ہیروئن (چِٹا) جیسی منشیات برآمد کر کے دو مبینہ اسمگلروں کو گرفتار کر لیا۔ پولیس ترجمان کے مطابق یہ کارروائی ایس ایس پی کٹھوعہ موہیتا شرما کی مجموعی نگرانی میں انجام دی گئی۔
گزشتہ شب پولیس نے مصدقہ اطلاع کی بنیاد پر گالک علاقے میں خصوصی ناکہ لگا کر چیکنگ شروع کی۔ اس دوران دو مشتبہ افراد کو، جو ڈِنگہ امب کی طرف سے گالک جا رہے تھے، روک کر تلاشی لی گئی۔ گرفتار شدگان کی شناخت ابھیشیک سنگھ ولد ترلوچن سنگھ ساکن مکوال چنجی تحصیل رام کوٹ ضلع کٹھوعہ اور مسکین علی عرف ٹِکّو ولد شیرو ساکن گالک تحصیل رام کوٹ کٹھوعہ کے طور پر ہوئی ہے۔ تلاشی کے دوران ابھیشیک سنگھ کے قبضے سے تقریباً 3.08 گرام جبکہ مسکین علی کے قبضے سے تقریباً 6.62 گرام ہیروئن نما مادہ برآمد ہوا، جس کی مجموعی مقدار تقریباً 9.7 گرام بنتی ہے۔ پولیس نے منشیات کو ضبط کر کے دونوں ملزمان کو موقع پر ہی حراست میں لے لیا۔
اس سلسلے میں تھانہ بلاور میں ایف آئی آر نمبر 74/2026 درج کر کے این ڈی پی ایس ایکٹ کی متعلقہ دفعات کے تحت مزید تحقیقات شروع کر دی گئی ہیں۔ کٹھوعہ پولیس نے عوام سے اپیل کی ہے کہ وہ منشیات یا کسی بھی غیر قانونی سرگرمی سے متعلق معلومات پولیس کے ساتھ شیئر کریں۔ اطلاع دینے والوں کی شناخت کو مکمل طور پر خفیہ رکھا جائے گا۔
ہندوستھان سماچار
--------------
ہندوستان سماچار / محمد اصغر
