ناسک ، 19 اپریل (ہ س)۔

مہاراشٹر کے ناسک میں پیش آئے عصمت دری کے پانچویں معاملے میں ضلع عدالت نے اتوار کے روز ملزم اشوک کھرات کو پانچ دن کی پولیس کسٹڈی میں بھیج دیا ہے۔ اس کیس کی تحقیقات کررہی اسپیشل انویسٹیگیشن ٹیم (ایس آئی ٹی) نے ملزم کو ویڈیو کانفرنسنگ کے ذریعے عدالت میں پیش کیا۔سماعت کے دوران سرکاری وکیل نے عدالت کو بتایا کہ ملزم کا جرائم کرنے کا طریقہ ایک جیسا رہا ہے، تاہم متاثرین مختلف ہیں۔ انہوں نے کہا کہ ملزم خواتین کو غیر قانونی اشیاء کھلا کر اور دھوکہ دے کر ان کے ساتھ زیادتی کرتا تھا، اور اس جرم کے پس پردہ سازش کی مکمل چھان بین کے لیے پولیس کسٹڈی ضروری ہے۔دوسری جانب ملزم کے وکیل نے پولیس کسٹڈی کی مخالفت کرتے ہوئے کہا کہ سرکاری فریق پہلے بھی یہی نکات پیش کر چکا ہے اورمالی معاملات سمیت دیگر پہلوؤں کی پہلے ہی تحقیقات ہو چکی ہیں، اس لیے مزید ریمانڈ کی ضرورت نہیں ہے۔ تاہم عدالت نے متاثرین کی تعداد اور جرم کی سنگینی کو مدنظر رکھتے ہوئے ملزم کو پانچ دن کی پولیس کسٹڈی دینے کا حکم دیا۔قابل ذکر ہے کہ اشوک کھرات کو ایک خاتون کی شکایت پر 18 مارچ کو گرفتار کیا گیا تھا، جس کے بعد اس کے خلاف مجموعی طور پر 14 مقدمات درج کیے گئے ہیں۔ ان میں سے 8 مقدمات جنسی استحصال اور 6 دھوکہ دہی سے متعلق ہیں۔ اب تک پولیس چار مقدمات کی تحقیقات مکمل کر چکی ہے، جبکہ پانچویں معاملے میں بھی پانچ دن کی پولیس کسٹڈی حاصل کر لی گئی ہے اور مزید تحقیقات جاری ہیں۔ہندوستھان سماچار

ہندوستان سماچار / جاوید این اے