ڈھاکہ، 13 اپریل (ہ س)۔ بنگلہ دیش کرکٹ بورڈ (بی سی بی) نے اتوار کو سری لنکا کے خلاف ہونے والی تین میچوں کی ون ڈے سیریز کے لیے 15 رکنی ٹیم کا اعلان کر دیا ہے۔ اس ٹیم میں 20 سالہ وکٹ کیپر بلے باز زویریہ فردوس کو پہلی بار شامل کیا گیا ہے۔

ایک اور اہم فیصلے میں دائیں ہاتھ کی بلے باز شرمین سلطانہ کی سات سال بعد ایک روزہ ٹیم میں واپسی ہوئی ہے، جس سے ٹیم کے بیٹنگ آرڈر کو تجربہ ملے گا۔ ٹیم کی کپتانی نگار سلطانہ جوٹی کے ہاتھوں میں ہوگی، جبکہ ناہیدہ اختر نائب کپتان رہیں گی۔

زویریہ فردوس اب تک بنگلہ دیش کے لیے سات بین الاقوامی ٹی-20 مقابلے کھیل چکی ہیں اور اس ایک روزہ ٹیم میں شامل واحد نئی کھلاڑی ہیں۔ ان کا انتخاب یہ اشارہ دیتا ہے کہ سلیکٹرز آنے والے مصروف سیزن کو مدنظر رکھتے ہوئے نوجوان کھلاڑیوں کو موقع دینا چاہتے ہیں۔

سری لنکا کی ٹیم 17 اپریل کو بنگلہ دیش پہنچے گی اور براہِ راست راجشاہی جائے گی، جہاں ون ڈے سیریز کا انعقاد ہوگا۔ دونوں ٹیمیں سیریز سے پہلے دو دن مشق کریں گی۔

تین میچوں کی یہ سیریز 20، 22 اور 25 اپریل کو راجشاہی ڈویژنل اسٹیڈیم میں کھیلی جائے گی۔ تمام مقابلے صبح 9.30 بجے سے شروع ہوں گے۔

اس کے بعد 26 اپریل سے دورہ سلہٹ میں ہوگا، جہاں تین میچوں کی ٹی-20 سیریز سلہٹ انٹرنیشنل کرکٹ اسٹیڈیم میں منعقد کی جائے گی۔ سری لنکا کی ٹیم 3 مئی کو دورہ ختم کر کے واپس لوٹے گی۔

بنگلہ دیش ایک روزہ ٹیم:

نگار سلطانہ جوٹی (کپتان)، ناہیدہ اختر (نائب کپتان)، فرزانہ حق، شوبھنا موسٹری، فہیمہ خاتون، شارمن اختر سپتا، ریتو مونی، شورنا اختر، رابعہ خان، شرمین سلطانہ، معروفہ اختر، فریحہ اسلام ترشنا، سلطانہ خاتون، سنجیدہ اختر میگھلا، زویریہ فردوس۔

ہندوستھان سماچار

---------------

ہندوستان سماچار / انظر حسن