نئی دہلی، یکم اپریل (ہ س)۔ سپریم کورٹ نے دھر میں بھوج شالا مندر-کمال مولا مسجد تنازعہ کی سماعت کرتے ہوئے فیصلہ دیا ہے کہ مدھیہ پردیش ہائی کورٹ اے ایس آئی کے ذریعہ کئے جانے والے سروے پر مسلم فریق کے اعتراضات کی سماعت کرے گی۔ جسٹس سوریہ کانت کی سربراہی والی بنچ نے کہا کہ وہ ہائی کورٹ کی کارروائی میں مداخلت نہیں کرے گی۔

سماعت کے دوران عدالت نے کہا کہ وہ مدھیہ پردیش ہائی کورٹ کی کارروائی میں مداخلت نہیں کرے گی۔ ہائی کورٹ سائنسی سروے سمیت تمام معاملات کی سماعت کرے گی۔ سماعت کے دوران مسلم فریق کی جانب سے سینئر وکیل سلمان خورشید نے شواہد پر سوالات اٹھائے۔ انہوں نے کہا کہ مسلم فریق نے سروے کے دوران لی گئی تصاویر اور ویڈیو گرافی کی کاپیاں طلب کی ہیں تاکہ اعتراضات درج کئے جا سکیں۔ سپریم کورٹ نے پھر کہا کہ ہائی کورٹ نے ان اعتراضات کے لیے ایک ٹائم لائن مقرر کی تھی۔ جسٹس جویمالیا باغچی نے کہا کہ سروے کی ویڈیو گرافی عدالت میں چلائی جا سکتی ہے، اور تمام فریقین کو اس کی صداقت پر سوال اٹھانے کا حق ہے۔

واضح رہے کہ یکم اپریل 2024 کو سپریم کورٹ نے بھوج شالا کمپلیکس کے اے ایس آئی سروے پر روک لگانے سے انکار کر دیا تھا۔ مولانا کمال الدین ویلفیئر سوسائٹی نے سپریم کورٹ میں عرضی دائر کی، جس میں مدھیہ پردیش ہائی کورٹ کی اندور بنچ کے ذریعہ سروے کے سلسلے میں جاری حکم پر روک لگانے کی درخواست کی گئی۔ ہندو تنظیموں کے مطابق دھار میں واقع کمال مولانا مسجد سرسوتی مندر بھوج شالہ ہے جسے سنسکرت کی تعلیم کے لیے راجہ بھوج نے 1034 میں تعمیر کیا تھا۔ ہندو فرنٹ فار جسٹس نے اسی کمپلیکس کے سائنسی سروے کے لیے ہائی کورٹ میں عرضی دائر کی تھی اور عرضی پر سماعت کرتے ہوئے ہائی کورٹ کی اندور بنچ نے اے ایس آئی کو سائنسی سروے کرنے کا حکم دیا تھا۔ سپریم کورٹ نے مدھیہ پردیش ہائی کورٹ سے بھوج شالا معاملے میں سروے پر مسلم فریق کے اعتراضات پر غور کرنے کو کہا ہے۔

ہندوستھان سماچار

---------------

ہندوستان سماچار / عبدالواحد